Министерот за земјоделство, Љупчо Николовски истакна дека странската поддршка има важна улога во успешното креирање на досегашните и идни политики во домашното оризипроизводство, за пазарните стандарди, новите технологии во производството и воведување сорти ориз што се конкурентни и барани на домашниот и на европскиот пазар.
– Оризот како земјоделска култура кај нас има посебно место во програмата за финансиска поддршка поради традиционалните вредности и долгогодишното производство, како и неговата улога за развој на руралната економија и извозно препознатливиот бренд на регионот. Дополнителна олеснителна околност за откупните компании кои извезуваат ориз е што годинава со Србија е потпишан договор за признавање на македонскиот сертификат за ГМО, а радиоактивноста се испитува на самиот граничен премин, за што досега се чекаше и по неколку дена, но сега ја минуваат границата без задржување, рече Љупчо Николовски, министер за земјоделство.
Како дел од системските мерки за унапредување на производството на ориз во Македонија, Николовски ја нагласи поддршката од ресорното министерство за зајакнување на кадровските и обновување на техничките ресурси на Институтот за ориз во Кочани.
Во име на земјоделските производители од регионот, градоначалникот на Кочани, Николчо Илијев се заблагодари за поддршка од минсиетсртвото за земјоделство, но упати и забелешка за пласирањето невистините информации во јавноста за квалитетот на кочанскиот ориз.
– Оваа година кочанскиот ориз се соочи со уште една криза кога со неговото име беше поврзана генетска модификација. Иако по контролите во германските лаборатории тоа не се докажа, остана сомнежот кај потрошувачите, која е всушност вистината? Затоа, како стручњаци во оваа област дозволете ми да ве повикам, заедно, координирани и единствени да внимаваме на секој чекор што го преземаме, да му овозможиме на овој крај, кој со векови опстојува од оризопроизводството, да живее пристојно од својот труд, реле Николчо Илијев, градоначалник на Општина Кочани.
Министерството за земјоделство преку инструментот TAIEX во изминатиот период организираше експертска мисија и студиска посета во Италија за домашните стручни лица и за оризопроизводителите. Притоа беа опфатени теми за договарањето, маркетингот и продажбата на оризот, мерките за поддршка на производството, функционирањето на задругите, сортиментот, квалитетот и принципите на биодиверзитет и органско производство на ориз.
Т. Ајтовски
{fshare}
{backbutton}
©2023 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
