Општина Кочани упати писмен допис до ТВ Канал 8 во врска со објавената информација за Планинарскиот дом на Пониква, во која беше наведено дека и по две години од завршувањето на изградбата на објектот, тој стои празен, а неговата околина е запуштена.
Општината, како краен корисник на резултатите од проектот „Планински велосипедски рај“, во чии рамки се градеше Планинарскиот дом, наведува дека влезната врата од објектот сѐ уште е заклучена затоа што вкупните активности од споменатиот проект не се завршени и покрај тоа што планираниот рок за негова имплементација е истечен. Истиот беше финансиран со грант на ЕУ и администриран од страна на Светска банка, преку Кабинетот на заменик-претседателот на Владата задолжен за економски прашања.
-Околу 10% од планираните активности не се завршени, поради што Планинарскиот дом како објект не е предаден на управување на Општина Кочани од страна на Единицата за спроведување на Проектот за локална и регионална конкурентност, стои меѓу другото во реакцијата од Општината.
Од самото почнување на реализацијата на проектот, Општина Кочани континуирано реагирала за динамиката на реализација, рокот бил продолжуван во повеќе наврати, но проектот – останал незавршен. По реакциите од општинските служби до сите релевантни институции, дел од нив се заложиле за конечна финализација на проектот.
Од Општината додаваат дека се преземаат континуирани активности и се очекува целосниот проект да биде завршен, а со тоа да може да се стави во функција Планинарскиот дом на Пониква.
Целта на информацијата на ТВ Канал 8 беше да укаже на состојбата каква што е на терен во моментот, без да навлегува во меѓусебните односи на Општината со државните и сите други институции. Ако има какви било неправилности, недостатоци или потешкотии во спроведувањето на процедурите, а што очигледно постојат, за тоа има надлежни органи каде треба да се пријави и да се спроведе соодветна постапка.
Во информацијата за Планинарскиот дом никаде не е спомената Општината како директен виновник за состојбата во која е објектот. Од друга страна, наместо писмени реакции по објавени написи, можат да се користат познатите модели на комуникација со јавноста, меѓу кои се прес-конференциите, а што во изминатиот период целосно изостануваат.
©2023 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
