Дводневна обука за помош и поддршка за формирање енергетски задруги во Источниот регион се одржува во Кочани, во рамки на националната кампања што ја спроведува граѓанското здружение Институт за развој на заедницата (ИРЗ) од Тетово.
Целта на проектот е да се поттикне учеството на граѓаните во енергетската транзиција преку формирање на енергетски задруги кои треба да овозможат поефикасно користење на обновливите извори на енергија. Активностите се реализираат во соработка со организацијата Solare Zukunft од Германија, а финансиската поддршка ја обезбедува Германската Фондација за заштита на животната средина (DBU).
-Нашите напори за формирање енергетски задруги, што ќе функционираат како граѓански здруженија, се насочени кон искористување на сончевата енергија за добивање струја. Идејата е да се зголеми бројот на граѓани кои ќе постават фотонапонски централи за да обезбедат енергија за своите домови или таму каде што е потребно. Кој било граѓанин може да биде член во задругата за чие формирање има два модела, според законот за здруженија на граѓани или според законот за задруги, што неодамна го донесе Парламентот. Ние ставаме акцент и го промовираме првиот модел, со оглед што тоа повеќе одговара на искуството за енергетски задруги што веќе постојат во други земји, истакна Сретен Коцевски од Институтот за развој на заедницата.
Со здружување на средствата, граѓаните ќе можат полесно да инвестираат во фотонапонски централи, а законските прописи определуваат дека тоа треба да биде на одредена територија, односно во една точка каде што ќе се наоѓа електрично броило. ИРЗ се залага да се направат измени и дополнувања, со што фотонапонските инсталации на граѓаните од различни места системот ќе може да ги препознава дека припаѓаат на една енергетска задруга.
-Според актуелната законска регулатива, во споредба со западноевропските земји, кај нас граѓаните сè уште не можат да ги уживаат придобивките од формирањето на енергетските задруги, но со процесот за пристапување кон ЕУ и измените што треба да се направат треба да дојде до големи олеснувања за целата процедура. Клучна улога во процесот ќе има и ЕВН, како оператор со електрична енергија, кој ќе треба целата регулатива да ја преточи во пракса за да можат граѓаните да ги добијат очекуваните придобивки, додаде Коцевски
Во текот на имплементацијата на проектот, освен обуките ќе има и други активности, а обезбедена е и финансиска поддршка за формирање на енергетски задруги и инвестиции во соларни панели, консултации и студиска посета во Германија.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
