Во рамки на одбележувањето на Павловден – празникот на градот, синоќа во Виница се одржа свеченост на која беше отворена реконструираната киносала.
Проектот за реконструкција почна пред неколку години и беа инвестирани над 19,7 милиони денари, од кои половина од буџетот на Општина Виница, а половина од Центарот за развој на Источниот плански регион, преку Бирото за регионален развој. Целосно е реновирана фасадата и кровната конструкција, а во внатрешноста е обновено гледалиштето и сценскиот простор каде е инсталирано ново осветлување и современа опрема за прикажување аудиовизуелни дела.
-Се работи за функционален објект со капацитет од 200 посетители, во кој во иднина очекуваме да се реализираат голем број културни настани. Кај сите нас овој објект буди убави чувства и потсетување на едно време кога беа прикажувани филмови, театарски претстави и други сценски настапи, а токму денес, по неколку децении, се надеваме на негово повторно заживување. Оваа капитална инвестиција ќе придонесе за поквалитетен културен живот и насочување на младите кон вистинските животни вредности, истакна градоначалникот на Виница, Миле Петков.
Реконструираната киносала ќе работи во состав на Домот на културата „Тошо Арсов“ од Виница.
Во рамки на свеченото отворање на кино салата, беше прикажана видео проекција на македонски документарен филм, а актерот Петар Темелковски ја изведе монодрамата „Да се биде Македонец“, работена според посланијата на Светиот апостол Павле до Македонците.
Одбележувањето на празникот Павловден продолжи денеска со одржување на свечена седница на Советот на Општина Виница. Притоа, на најдобрите ученици од основните и средното училиште, кои се првенци на генерацијата, им беа доделени признанија.
Градоначалникот Петков ја истакна заложбата и на институциите и поединците во општината кои дале особен придонес за развојот, при што плакети им додели на најдобриот пожарникар, полицаец, медицински работник, како и на претставници од невладиниот и бизнис секторот.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
