Општинската организација на СДСМ од Кочани отвори изборен штаб во Трговскиот центар за што полесна и поефикасна комуникација со граѓаните и за претставување на програмските заложби за претстојните избори.
На отоврањето на штабот присуствуваше и носителката на кандидатската листа за пратеници од Изборната единица 3, Сања Лукаревска која пред присутните образложи неколку поенти од предизборната програма на СДСМ.
-Убедена сум дека она што го предвидовме за наредниот мандат во комбинација со она што го сработевме во претходниот, во исклучително тешки околности, ќе биде избор на граѓаните на 8 мај. Граѓаните знаат дека СДСМ е опција за безбедна, сигурна и предвидлива иднина. МојДДВ, која ја воведовме пред речиси 5 години, е уште еден ефикасен механизам за заштита на домашната економија и на државниот буџет, но и мерка преку која вративме близу 150 милиони евра во семејниот буџет на граѓаните. МојДДВ продолжува, а во 2025 година максималниот износ на поврат ќе го зголемиме на 2.400 денари, во 2027 на 2.700 денари, а на крајот на мандатот во 2028 година тој ќе изнесува 3.000 денари во едно тромесечие. Во програмата предвидуваме и низа мерки со кои сакаме да испратиме порака до младите дека СДСМ мисли и се потпира на нив, за што го најавуваме проектот „Грижа за младите“. Со него ќе се обезбедат по 200 евра во првите 12 месеци за секое прво вработување на лица до 26 години и станови за млади брачни парови до 29 години во чија откупна цена, дел од сумата ќе биде субвенционирана од Владата, истакна Лукаревска.
Во своето обраќање носителката на кандидатската листа, Лукаревска нагласи дека ќе продолжи и поддршката на македонското земјоделство , а капиталните инвестиции, развојот на туризмот и унапредувањето на спортот, се само дел од реформите во „Програмата за европска иднина”.
При отворањето на изборниот штаб, присутните граѓани имаа можност низ заеднички дијалог со Лукаревска да постават прашања за одредени актуелни теми што се од јавен интерес, а за што побараа да бидат вклучени во програмските определби на владините институции.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
