Општина Кочани информира дека продолжува со акцијата за засадување нови садници во градот, при што веќе се облагородени повеќе јавни површини во централното градско подрачје, како и на влезот и на излезот во Кочани.
Се засадуваат дрвца од јасен, јавор, јапонска цреша, црвена слива и други видови, што заслужува пофалба и поддршка во напорите за зголемување на зелената маса и за подобрување на квалитетот на амбиенталниот воздух. Едновремено од Локалната самоуправа апелираат до граѓаните грижливо и совесно да се однесуваат и да не ги оштетуваат новите садници и останатата високостеблеста вегетација.
Со акцијата веќе е оформена зелена ограда од источната страна на ОУ „Св. Кирил и Методиј“, но чудно е што се опфатени и земјените површини на повеќе кружни текови, како и на разделните зеленила.
Садењето високостеблести растенија во внатрешноста на кружните текови е проблематично од аспект на прегледност на вкрстувањето на улиците. Дрвјата во иднина, кога ќе се развијат и разлистаат, ќе бидат проблем за безбедноста во сообраќајот. Ако се мислело на естетскиот изглед на празниот простор, тогаш многу подобро решение е да се засадат трева и цвеќиња. Така возачите полесно и без визуелни препреки ќе ги забележат возилата што влегле во кружниот тек и ќе избегнат потенцијални незгоди.
Сенките од крошните нема да бидат од корист за возилата затоа што не можат да се паркираат под нив во топлите летни денови. Наместо тоа подобро е садниците, додека сè уште се млади, да се преселат на некој паркинг простор.
Грешки се прават, а добро е и кога се поправаат. Ќе има ли соодветна реакција?
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
