Денеска во Паркот на Револуцијата се одржа манифестацијата „Денови на медот 2023“, која годинава го имаше 26. издание во организација на пчеларското здружение „Матица“ од Кочани.
На настанот беа изложени мед и пчелни производи што граѓаните можеа да ги купат по саемски цени.
Претседателот на здружението „Матица“, Борчо Атанасов истакна дека на манифестацијата го изложуваат медот кој наоѓа примена во секојдневното здраво живеење.
-Денес, го отвораме нашиот саем за пчеларство кај што изложивме мед и пчелни производи. Пчеларски здруженија има од Кочани,Битола, Штип, Виница, Пехчево, Пробиштип и Куманово. Проблем оваа сезона беше појавата на крлежот, кој правеше штети, но со навремено реагирање на пчеларите се изборивме успешно, истакна Атанасов.
Годинава поддршка на манифестацијата дадоа и претседателот на Сојузот на здруженијата на пчелари на Македонија, Менде Трајковски и раководителот на подрачната единица при Министерството за земјоделство, шумарство и водостопанство, Горан Миладинов.
-Во Кочани и Битола оваа манифестација се одржува 26 години по ред и се надевам и сум сигурен оваа традиција ќе трае уште долго. Оставаме аманет овие манифестации да траат уште многу години. За следната година се договоривме да формираме Европски пчеларски сојуз со цел да бидеме поблизу до Брисел и до ЕУ и до финансиските средства. Ние во нашата држава добиваме и субвенции за кои сме благодарни многу и се во висина од околу 10. 000 евра. Овие години наназад со климатските промени ни се случуваат многу проблеми и немаме многу големи приноси, но работиме со љубов, истакна Менде Трајковски, претседател на Сојузот на здруженија на пчелари на Македонија.
-Како долгогодишни соработници со пчеларите, Министерството за земјоделство, шумарство и водостопанство преку своите програми ги поддржува овие манифестации кои се од локален карактер, а целта е да се развие свеста кај луѓето за значењето на пчелите. Исто така, Министерството ги поддржува пчеларите преку други различни програми и мерки, кажа Горанчо Миладинов, раководител на ПЕ на МЗШВ.
На манифестацијата беа доделени признанија и плакети за сите учесници. Пчеларот Николчо Данилов, член на ПЗ „Матица“, кој има 40-годишно пчеларско искуство, доби плакета за најдолг стаж во Здружението.
Манифестацијата беше збогатена со културно-уметничка програма на која настапија ученици од ОУ „Раде Кратовче“, од музичкото училиште „Ристо Јуруков“ и од културно-уметничкото друштво „Руен“од Кочани.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
