Општина Зрновци е во напредна фаза со подготвката на проекти за подобрување на условите во образовните институции, а што треба да се реализираат во текот на оваа година.
На денешната седница на Советот на Општината, градоначалникот Борчо Коцев информираше дека активностите ќе се реализираат во ОУ „Синиша Стоилов“ во Зрновци, како и во објектот на подрачното училиште во Видовиште.
-Работиме на две значајни проектни задачи, од кои едната е за почнување на основен проект со ревизија за изградба на нов објект во училишниот двор, односно до спортската сала, со намена за теретана и фитнес вежби. Мислам дека некаде за два месеци ќе биде завршен тој основен проект и ќе видиме за средства, истакна Коцев.
Вториот проект на кој ќе се работи се однесува на изградба на нова зграда на местото на подрачното училиште во Видовиште, каде е планиран и спортски терен, како и партерно уредување. Коцев нагласи дека се остварени контакти со Министерството за образование и со одлука што ќе треба да ја донесе општинскиот Совет по повеќе од десетина години нефункционирање на тоа училиште, ќе се добие соодветна намена на просторот кој е на атрактивна локација покрај пат.
– Наша обврска е да направиме инфраструктура, а потоа со дополнителни одлуки од Советот може да се направи преадаптација за користење на тој простор. Дали ќе остане образованието да менаџира, дали ќе направиме некоја нова локална институција или сето тоа ќе го изреализираме заедно со јавно- приватно партнерство, со услови коишто ние ќе му ги наложиме на тој партнер да ни овозможува услуги како за институциите, така и за сите жители. Бевме со проектант, видовме таму место каде што се одлага арско ѓубре од жителите. Инвестицијата можеби ќе биде 20 до 30 милиони денари, етапно ќе работиме, постојната зграда буквално тоа е, на еден начин терминолошки кажано од страна на архитектот и проектантот, рушевина каде што не може да се реконструира и надградува затоа што нема грам железо во самата градба. Подобро е на почетокот да се сруши и да се изгради сосема нова зграда и еден спортско рекреативен едукативен центар да имаме таму. Целта е да се привлекуваат посетители, рече Коцев.
Дополнително, градоначалникот информираше дека е поднесена апликација до Министерството за труд за доградба на детската градинка, што е прифатено и се очекува реализација од јуни. Ќе следи посета од проектанти и надзор од Светска банка, а се очекува да се добие нова целина којашто ќе овозможи нормално функционирање на вработените. Дополнително, ќе се добијат и две нови занимални за децата, со што ќе се зголеми капацитетот на градинката.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
