Општина Кочани го комплетира уредувањето на кружните текови кај двојниот мост на спојот на „Маршал Тито“ со улиците „Стево Теодосиевски“ и „Тодосија Паунов“ и во Стришани на „Димитар Влахов“ со „Страшо Ербапче“ и „Стево Теодосиевски“.
Согласно сообраќајната документација за утврдениот режим, како и по добиената согласност од СВР – Штип и издаденото решение за режим на сообраќај , на кружните текови се поставува сообраќајна опрема за подобро регулирање на движењето на возилата, но и поурбан изглед на целата околина. Инсталирањето на опремата го изведуваат работници на компанијата „Бојта инг“ од Скопје која беше избрана на тендерската постапка, по што беше потпишан договор во бруто износ од над 2,6 милиони денари.
-Претходното уредување на кружните текови со столпчиња беше привремено, а ова е во согласност со сообраќајната документација. Во временскиот период што беше најавен, согласно правната регулатива, тендерските објави и потпишаните договори со изведувачите и завршените процедури, денеска се почнуваме со оперативната теренска работа. По поставувањето на новата сообраќајна опрема, кружните текови ќе бидат хортикултурно уредени, истакна Жаклина Пауновска Анѓелковиќ, овластен инспектор за патен сообраќај.
Следни чекори ќе бидат поставување вертикална и хоризонтална сигнализација, а потоа и промена на режимот на сообраќај со еднонасочен на одредени улици во централното градско подрачје на Кочани.
Според најавите од стручните служби во Општината, ќе се промени правецот на движење на возилата, односно на улицата „Маршал Тито“ од мостот кај Шопинг центарот ќе се вози само во правец кон двојниот мост кај Гимназијата, а на „Кеј на Револуцијата“ од кружниот тек кај Полицијата ќе се вози само во правец кон крстосницата со „Браќа Ставреви“.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
