Советникот Венко Крстевски денеска беше избран за в.д. градоначалник на Општина Кочани. Кандидатурата на Крстевски со девет гласа „за“ ја поддржа советничката група на СДСМ, а воздржано гласаше советничката од Левица. Членовите на Советот од ВМРО-ДПМНЕ својата поддршка му ја додадоа на нивниот координатор Гоце Марков, кој исто така беше предложен за функцијата.
Изборот на в.д. градоначалник се одржа на денешната 62. седница на Советот на која оваа точка беше единствена на дневен ред, а дојде по оставката на градоначалникот Љупчо Папазов, кој е еден од осомничените за пожарот во дискотеката „Пулс“.
Лична кандидатура за в.д. градоначалник на седницата поднесе советникот Венко Крстевски, при што даде кратко образложение за причините поради кои се решил за таков потег.
Советникот Мирче Стојков на седницата истакна дека советничката група на ВМРО-ДПМНЕ поднела писмена кандидатура за нивниот колега Гоце Марков.
Советничката од ВМРО ДПМНЕ, Кристина Атанасова Арсова на седницата јавно ја предаде својата оставка на функцијата. Образложи дека не прифаќа вакво политичко препукување особено што и самата е засегната бидејќи нејзиното дете е едно од повредените во пожарот во дискотеката „Пулс“.
Кандидатите за в.д. градоначалник имаа кратки образложенија на своите кандидатури, по што на седницата беа изнесени низа лични дискредитации и навреди за и меѓу предложените кандидати. Поради тоа претседателот на Советот, Лазо Митев даде едночасовна пауза.
По паузата беше предложено изборот на в.д. градоначалник да се направи со поединечно гласање, при што имаше два круга. Во првиот круг, според законските одредби, изборот е од вкупниот број членови на Советот. На гласањето и двајцата кандидати добија по 9 гласа „за“, откако советничката од Левица гласаше воздржано, а советничката Кристина Атанасова Арсова претходно ја напушти седницата.
На повтореното поединечно гласање во вториот круг кандидатот Венко Крстевски доби 9, а за неговиот противкандидат Гоце Марков гласаа 8 советници. По таквиот резултат, претседателот на Советот на Општината констатираше дека за в.д. градоначалник е избран Крстевски.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
