Поголем дел од членовите на Советот на Општина Кочани не се задоволни од прикажаните резултати во извештаите за работењето воопшто, како и за финансиското работење на КЈП „Водовод“ во првите шест месеци од оваа година. Поради тоа не дадоа согласност при гласањето на двата документа што беа дел од дневниот ред на 31. седница.
Во дискусиите на советниците главните забелешки беа дека состојбата во комуналното претпријатие е лоша, тоа веќе прикажува минус од околу дваесет и два милиона денари, а граѓаните од поодамна реагираат за проблемите со јавната хигиена, со водоснабдувањето и со чадењето и загадената околина на градската депонија кај селото Бели.
-Зарем не е срамота ова што се случува со депонијата, да седиме и да траеме? Луѓето не можат да дишат. Директоре, во извештајот читам за третирање со зелени алги. Претходно се третираше со зелени алги и се гаснеше, сега некако тие алги како да се од нова фирма, што ќе правиме со депонијата, праша Ивица Лазаров, член на Советот на Општина Кочани.
-Срамно е тоа што се случува со депонијата, но патетично е да го зборувате ова сега кога и во претходната локална власт беше проглем со депонијата. Каде бевте вие четири години претходно да алрмирате кога се палеше и гореше? Има и други аргументи за таа депонија, но вие очигледно сакате да заштите некои припадници на МВР кои во врска со неа не преземаат ништо. Каде се кривичните пријави што претходно можевте да ги доставите за сите луѓе кои живеат буквално на таа депонија и се одговорни за нејзиното палење, истакна Мирче Стојков, член на Советот на Општина Кочани.
-На граѓаните им е сосема сеедно и не им е гајле кој раководи, туку како раководи со „Водовод“, депонијата е проблем што бара решение. Самото претпријатие досега нема понудено ниту една точка за какво било можно решение, односно се нуди „мако моја помини на друг“, ќе се решело кога ќе имало некоја регонална депонија, а дури да има, ние ќе се иструеме тука, истакна Жаклина Филипова Свеќароска, членка на Советот на Општина Кочани.
Од раководството на „Водовод“ имаше само кратко образложение за преземените активности.
-Најмалку три или четири известувања до МВР се испратени, со една средба во живо, во нивни простории. Депонијата е комплексно прашање и чинење на прскање со алги, според колегите од другите јавни претпријатија, би било околу 70 илјади евра на годишно ниво. Може и повеќе и помалку, во зависност до циклусот и цикличноста на прскањето. „Водовод“ не е во можност да издвои повеќе средства од тие што ги има, затоа што толку се. Решението е наметнато, дека ќе има регионална депонија, затоа добиваме ѓубре и од соседните општини, истакна Антонијо Паунов, директор на КЈП „Водовод“.
Незадоволни од општата состојба со јавната хигиена, со депонијата, со водоснабдувањето и другите надлежности на комуналното претпријатие, на крајот од дискусиите за овие точки, советниците не дадоа поддршка на извештаите за работењето на „Водовод“.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
