Со отворање на изложбата на карикатури и прогласувањето на добитниците на наградите од меѓународниот конкурс, вечерва во фоајето на Домот на културата „Тошо Арсов“ почна фестивалот на хумор и сатира „Ин Виница веритас“.
Темата на која што работеа карикатуристите беше „Нештата стануваат возможни“, а според пропозициите секој учесник можеше да испрати најмногу по три дела.
-Жирито чии членови се Дамир Новак од Хрватска, Бернард Боутон од Франција, Мирослав Хајнос од Полска, Благица Стојановска и Наташа Костовска од Македонија имаше навистина тешка задача да направат селекција од многубројните карикатури. Годинава на објавениот конкурс се пријавија вкупно 224 автори од 46 земји од светот и добивме солидни 622 карикатури. Првата награда му припадна на Фернандо Пика од Колумбија, второнаграден е Јианг Лио од Кина, а на трето место се најде карикатурата на Хуан Габриел Бенавидес од Шпанија, истакна Благица Стојановска, директорка на Домот на културата „Тошо Арсов“.
Фестивалот за отворен го прогласи градоначалникот на Виница, Миле Петков, при што нагласи дека гордост е што продолжува традицијата која беше возобновена пред неколку години.
-Посебно ме радува што оваа манифестација повеќе години фигурира на интернационалната мапа на фестивали на хумор и сатира, пред сѐ поради учеството на врвни карикатуристи од целиот свет. И оваа година, со добра соработка, не застанавме и успеавме да продолжи „Ин Виница веритас“. Наредната година овој фестивал ќе блесне со поголем сјај во новата сала што ќе наликува на светска сцена. По 15. пат Општина Виница финансиски го помага овој фестивал што со право прераснува во културно обележје на општината и регионот, истакна градоначалникот Петков.
Овогодишното фестивалско издание што ќе трае до 21 октомври, има редуцирани програмски содржини поради градежните работи за реконструкција на внатрешноста на Домот.
В четврток од 19 часот во фоајето на Домот на културата ќе се одржи Вечер на афоризми посветена на Бошко Перински, а потоа ќе следи сатиричното шоу „Прес конференција на Влада“. В петок претпладне Миле Ѓорѓијоски ќе одржи едукативни часови за карикатура и афоризми со ученици од основните училишта од Виница. В петок, на затворањето на Фестивалот, од 20,30 часот во ресторанот Александар Парк стендап настап ќе има комичарот Бојан Велевски.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
