Со одигрување промотивен фудбалски натпревар меѓу учениците, денеска во ОУ „Никола Карев“ од Кочани беше предадено во употреба ново спортско игралиште со вештачка трева, како инвестиција на Министерството за спорт.
На свеченоста по повод предавањето во употреба присуствуваше и министерот за спорт, Борко Ристовски, кој ја нагласи важноста од созадавање услови за спортување на најмладите.
-Наша цел како министерство не е само да се грижиме за врвниот спорт, туку за нас претставува успех кога ќе видиме дека ваквите спортски игралишта се полни, кога има масовност. Така се грижиме за иднината, а секоја наша инвестиција има економска оправданост со тоа што е можно повеќе млади и деца спортуваат на терените. Сакаме да им дадеме шанса да се занимаваат со спорт и рекреативно и професионално, за што најпрво треба да создадеме услови за да се развива спортот, а училиштата се вистинска основа за тоа, истакна министерот Борко Ристовски.
Од ОУ „Никола Карев“ упатија благодарност за поддршката од ресорното министерство, при што беше нагласено дека од ова училиште веќе произлегле познати фудбалски имиња кои веќе се репрезентативци.
-Му благодарам на министерот за тоа што денеска ни овозможи да биде присутен овде и да даде дополнителен мотив за сите млади кои се љубители на спортот, како министер, како спортска легенда која се избор да има министерство за спорт. Благодарни сме како училиште и како спортисти , се надевам дека многу таленти ќе излезат од овој терен, како Манев и Максимов кои се во „А“ селекцијата и се надевам дека уште многу наши ученици и од општина Кочани ќе нѐ претставуваат како амбасадори и првите чекори ќе го напрасват токму на ова игралиште, истакна Александар Андов, директор на ОУ „Никола Карев“.
Новоуредениот спортски терен во ОУ „Никола Карев“ обезбедува соодветни услови за мал фудбал, а со постојното осветлување натпреварите ќе можат да се играат и во вечерните термини.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
