Матурантите од двете средни училишта во Кочани го полагаат вториот екстерен испит, што е задолжителен во рамките на државната матура. Учениците имаа можност да избираат меѓу еден странски јазик и математика.
Поголем дел од матурантите избрале да го решаваат тестот по англиски јазик. Полагањето почна навремено, односно во 10 часот, а како и на првиот испит, средношколците четиригодишниот материјал го полагаа во холовите и спортските сали. Притоа на учениците им беа одземени и мобилните телефони, за да се спречи масовното препишување и споделување на одговорите.
Правилото налага во текот на полагањето во трите часа, да нема пауза. Има можност ученикот да излезе и да се врати, до тоалет, со придружба на тестатор.
-Во нашето училиште СОУ „Љупчо Сантов“ вкупно полагаат 127 ученика, од кои 121 полагаа англиски јазик, а шест ученика го полагаат предметот математика. Правилата се исти, како и од минатата сабота. Пред да влезат во училиштето ги оставаат мобилните телефони во посебни кутии, а им се одземаат и останатите предмети, како на пример чанти и слично. Во наредниот период следуваат и полагањата на интерните испити, терминот е во зависност од тоа кои предмети учениците ги имаат избрано. Првиот интерен предмет ќе се полага на 18 јуни, истакна Катерина Димитрова, СОУ „Љупчо Сантов“.
Прелиминарни резултати од државната матура ќе има најдоцна на 8 јули, односно 30 дена од полагањето на последниот испит, по што ќе следи можноста за поднесување приговори.
Државната матура кај нас се спроведува од 2008 година, како законска обврска и услов за упис во високообразовна установа.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
