На денешната, десетта седница на Советот на Општина Кочани, една од клучните теми на интерес беше прашањето за (не)работењето на градскиот базен во текот на минатата сезона.
Градоначалникот на Општина Кочани, Владко Грозданов, кој беше повикан да даде образложение за моменталната ситуација, истакна дека Општината работи „максимално“ за да се избегне повторување на минатогодишното сценарио кога градот остана без функционален базен.
Притоа нагласи дека уште од почетокот на неговиот мандат се водат разговори со концесионерот и правните служби за да се најде излез од сложената правна ситуација.
-На никој не му одговара и оваа година да нема базен во Кочани, истакна градоначалникот, критикувајќи ги политичките тензии во Советот кои ги нарече „театар“.
Според Грозданов, главната пречка за брзо решение е постоечкиот правен акт за концесија, кој мора да биде или регуларно раскинат или продолжен, предупредувајќи дека работата може да заврши на суд.
-Концесионерот си има своја приказна, неговите адвокати имаат нивно мислење. Нашата правна служба е пожртвувана по секоја цена базенот да работи, без разлика дали ќе биде како што е или било како, и веќе може да дојдат работите до суд. Ние не можеме на концесионерот да му кажеме ‘ти нема да го работиш’. Тој има право на основа за што да се брани, рече Грозданов.
Општината веќе три месеци била во процедура за решавање на овој спор, нагласувајќи дека мора да се почитуваат законските рамки за да се избегне „анархија“.
Во дискусијата беа разгледани неколку сценарија за понатамошно управување со базенот.
Едната опција е актуелниот концесионер да продолжи со работа, по што би бил повикан да го презентира својот план за организација. Втората опција, доколку тој се откаже, е барање на нов концесионер, при што градоначалникот навести желба за поголема вклученост на Општината.
-Дали ќе е приватно или јавно претпријатие, исто така правно мора да се постави. Ние ќе гледаме да може да е тоа под наша контрола, бидејќи сега вината е префрлена на самиот концесионер, додаде Грозданов.
Иако градоначалникот мораше набрзо да ја напушти седницата поради други обврски, тој истакна дека стои на располагање за дополнителни прашања во писмена форма, согласно деловникот за работа на Советот. Сепак, останува неизвесноста дали правните процедури ќе бидат завршени навреме за претстојната летна сезона.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
