Ученички тим од СОУ „Љупчо Сантов“ од Кочани, исто како и лани, и годинава доби паричен ваучер за иновативен проект за еколошко решение за прочистување на воздухот. Признанието е доделено на вториот циклус од Bootcamp-oт во Струга, во рамки на програмата „Upshift“ што ја спроведува здружението Лидери за едукација, активизам и развој (LEAD).
Исто така, кочанската гимназија го доби и епитетот НАЈUPSHIFT средно училиште, како најнаградувано во рамките на UPSHIFT програмата.
Како финалисти на кампот имало 10 тимови од средните училишта во држава со вкупно 50 ученици, кои заедно со своите ментори работеа на иновативни решенија со кои дејствуваат врз загадениот воздух и го подобруваат неговиот квалитет.
Во тимот од „Љупчо Сантов“ беа учениците во втора година Александра Чолева, Михаела Манчова, Сара Јорданова, Марко Костадинов Крстев и Давид Лазаров под менторство на професорот Борче Алексов. Тие работеа на своето иновативно решение ЕКОСЕПАРО ФИЛТЕР, односно ЕКО ДРВО кое преку своето стебло – отпадниот сепаратор на сензори ќе врши селектирање на отпадот по категории и ќе има влијание врз спречувањето на појава од стакленички гасови како главни причинители на глобалното затоплување.
Од друга страна ЕКО ДРВОТО има и решение за подобрување на квалитетот на воздухот преку неговиот воздушен филтрат, кој е составен од ползечко растени, врз подлога од зеолит и активен јаглен. Можноста на ова растение да генерира кислород преку процесот на фотосинтеза, како и добро познатите бенефити на активниот јаглен и зеолитот во делот на прочистувањето на воздухот му даваат уште една поширока димензија на решението да има двојно делување, истакнуваат од СОУ „Љупчо Сантов“.
Ваучерот што го добија нашите ученици е во вредност од 120 илјади денари и тие треба да се искористат за натамошен развој на идејата.
Програмата „Upshift“ се реализира во средните училишта за да се поттикнат иновативни идеи кај учениците за решавање проблеми во нивната заедница, а финансиската поддршка ја обезбедуваат УНИЦЕФ, Фондот за иновации и технолошки развој (ФИТР) и Амбасадата на Шведска.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
