Југословенската тробојка со петокрака, заедно со актуелното македонско знаме повторно се развиорија во Паркот на Револуцијата во Кочани. Членовите на Здружението „Јосип Броз Тито“ се собраа за да го одбележат 29 Ноември – роденденот на поранешната заедничка држава на дел од балканските народи – Социјалистичка Федеративна Република Југославија.
За разлика од претходните години, изостана дефилето со возила по улиците на Кочани, а членовите на Здружението положија свежо цвеќе на бистите првоборците Љупчо Сантов и Раде Кратовче, скромно и достоинствено присетувајќи се на важноста што овој ден го имаше за сите кои живееја во СФРЈ. Притоа, нагласија дека со одржувањето на второто заседание на АВНОЈ во босанското гратче Јајце пред 82 години, придобивки има и македонскиот народ.
-Тогаш веќе скоро една петтина од југословенската територија беше ослободена од партизанските одреди на Југославија. Исто така, беа одземени правата на владата во Лондон да ја претставува Југославија како држава, а тоа помина на владата на Југославија, односно на АВНОЈ којшто имаше и законодавни и извршни тела. На ова заседание исто така беше донесена одлука за востановување на чинот маршал, кој чин му е доделен на нашиот Јосип Броз Тито. На седница на Народниот комитет за ослободување на Југославија беше избран и за претседател. Подоцна беше одржано и трето заседание на АВНОЈ во Белград, во ослободена Југославија на коешто беа донесени и понатамошни одлуки за удирање на темелите на идната Социјалистичка Федеративна Република Југославија, чиј дел секако беа сите републики, меѓу кои и нашата Македонија, којашто никогаш не треба да заборави дека нејзин фактички темелител е Јосип Броз Тито за коешто ние ќе му бидеме вечно благодарни, истакна Трајче Трендов, претседател на Здружението „Јосип Броз Тито“.
Во сеќавањата за денот на создавањето на федеративната југословенска држава, кочанските титовисти потсетија на нејзините главни карактеристики и обележја и истакнаа дека таа била почитувана во целиот свет.
-Да ги посетиме сите државјани на оваа најубава држава Југославија на пасошот, југословенски, што беше многу ценет, како кај нас, и во целиот свет. Сите го бараа овој пасош, но за жал некои од нас го плукаат, а ние сега се радуваме на туѓи пасоши, нагласи Ѓорѓи Николов, член на Здружението „Јосип Броз Тито“.
Со заедничка фотографија пред спомен обележјето на првоборците од кочанскиот крај, титовистите порачаа дека спомените за социјалистичка Југославија не треба никогаш да згаснат, за помладите генерации да знаат за остварувањето на вековниот стремеж на македонскиот народ за создавање сопствена држава.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
