Советот на Општина Кочани ја одржа редовната 28. седница на која од дваесетината точки на дневниот ред отпаднаа една третина, откако беше констатирано дека нема услови за нивно разгледување. Тоа внесе конфузија во работењето поради што имаше неколку прекини и паузи за да се смират емоциите и нервозата во дискусиите на советниците.
До необична ситуација дојде кога претседателот на Советот, Лазо Митев ги повлече од дневниот ред точките поврзани со финансиското работење на КЈП „Водовод“ во минатата и првите три месеци од оваа година, како и измените на одлуките за утврдување тарифи за водата за пиење и за одведување и пречистување на отпадните води. Во образложението тој наведе дека претходно овие точки не биле разгледувани комисиски затоа што надлежните комисиии немале кворум и не одржале седници.
На пленумската седница пак, немаше ниту еден претставник од раководството на „Водовод“, што наиде на реакција кај опозициската советничка група. Беше оценето дека се работи за непочитување на институцијата Совет од страна на директорот и неговите соработници, па беше побарано тој да биде сменет од функцијата.
-Дали ова го има некаде, сакам да го прашам градоначалникот. Вие сте биле директор на „Водовод“, дали некогаш не сте ги испочитувале советниците на овој начин? Бараме да го смените директорот, ова е срамота, истакна Ивица Лазаров, член на Советот на Општина Кочани.
Претходно, не беа прифатени и годишните планови за вработување во СОУ „Гошо Викентиев“ и ОУ „Малина Попиванова“ за идната година.
Во продолжението на седницата, советниците разгледаа и усвоија повеќе планови и програми за работа на Локалната самоуправа, а што се од областа на урбанистичкото планирање, уредувањето на градежното земјиште и на патната инфрастуктура, како и на локалниот економски развој.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
