Обвинители, дали нашиот молк, тишината и тагата по нашите деца, кои се убиени, ви даде право да ослободите лица кои беа во притвор, а се соучесници во убиството на нашите деца, прашаа родителите на настраданите во пожарот во дискотеката „Пулс“ пред почетокот на денешниот трет протестен марш „Задоцнета реакција“ што се одржа во Кочани.
Точно во 12 часот и 5 минути учесниците на маршот тргнаа од Паркот на Револуцијата кон Трговскиот центар, кон општинската зграда, а оттаму се упатија кон Полициската станица и Судот и Обвинителството во Кочани.
-Нѐ прашува ли некој нас како ги минуваме деновите, какво е чувството да знаеш дека детето никогаш повеќе нема да се врати дома, да ги видиш неговите убави очи, неговата убава насмевка, да го слушнеш како се смее, да дочекаш уште еден Велигден со него. Живееме за да одиме на гробишта, да си помуабетиме со нашите деца, да им раскажеме колку тие недостигаат дома. Ќе продолжиме да излегуваме и да ги потсетуваме челниците на оваа скапана држава дека сме тука и до наш последен здив ќе ја бараме правдата за сите починати и повредените на 16. март, бидејќи ги закопавме нашите деца поради нечии грешки, поради тоа што некој бил корумпиран, поради тоа што ја злоупотребил својата функција за пари, за корист за личен бенефит. Нашите деца ги нема, но правдата мора да излезе на виделина, порача Јулија Златкова, чиј син настрада во пожарот.
Пред општинската зграда родителите истакнаа дека отсега будно ќе ја следат работата на надлежните инспекциски служби, а в.д. градоначалникот Венко Крстевски им порача дека дава целосна поддршка и дека нема да бидат осамени во барањето правда, затоа што сите заеднички треба да го променат системот што е нефункционален.
На собирот пред Полициската станица родителите гласно упатија прашање зошто полициските службеници кои последни беа вклучени во истрагата на Обвинителството се пуштени дома.
-Предвреме ја најавија рацијата, а полицајците цел час чекаа надвор за да ги сокријат малолетниците и да си ја распродадат дрогата. Не сакаа да помогнат во спасувањето на нашите деца, туку стоеја отстрана и гледаа, рекоа присутните на маршот.
Тагата и револтот родителите на загинатите во трагичниот пожар ги искажаа пред Судот и Обвинителството, секој одделно споменувајќи го името на своето дете и плановите што ги имале за во иднина.
-Немате одговор до кога ќе ја одолговлекувате истрагата, а ги пуштивте убијците на нашите деца да го прослават Велигден со нивните семејства. Знаете ли дека ние за празникот, на доручек, ручек и вечера сме на гробишта со нашите ангели. Во модуларната болница во Тетово виновен беше кабелот, а во овој случај изгледа виновни ќе бидат нашите деца, истакнаа родителите на загинатите.
Протестниот марш заврши во Паркот на Револуцијата, а присутните најавија дека ќе се одржува секоја сабота сѐ додека не ја добијат бараната правда за своите најблиски.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
