Узурпацијата на државното земјиште, а особено на полските патишта е сериозен проблем со кој се соочуваат вработените во водостопанската подружница „Брегалница“ пред почетокот на секоја сезона за наводнување. Стеснетите коловози поради заземањето на дел од нивната површина и претворање во мини депонии, на кои се исфрлаат отпад и остатоци од исечена вегетација, го отежнуваат пристапот на механизацијата што е ангажирана за чистење и оспособување на вадите и каналите.
Проблемот со узурпацијата се провлекува со години и покрај досегашните иницијативи за соодветно решение, сè уште е актуелен и видлив токму во овој период од годината. Локалната самоуправа на Кочани нема законска надлежност врз земјоделското земјиште, особено во делот на разграничувањето на парцелите што се во приватна и државна сопственост.
На последната седница на Советот на Општината проблемот повторно беше посочен преку можноста за советнички прашања, при што се побара ангажирање и на државните институции кои имаат надлежност за негово решавање.
– Полските патишта не се во сопственост на Општина Кочани, туку на РМ бараме претходно донесената одлука и записникот да бидат спроведени до Агенцијата за рурален развој, до Земјоделие, до Источниот плански регион или каде било, да се изврши катастарско размерување на истите, за да може водостопанската подружница да ги чисти вадите. Оваа година поради поволната сезона од браната Калиманци, најверојатно 90 отсто од полето ќе биде со ориз, но проблем сè уште претставуваат вадите и тие полски патишта. Затоа, апелирам да се види чија е надлежноста, да се најде таа одлука и да се испрати до Министерството за земјоделство, да се направи катастарско размерување, затоа што од водостопанската подружница не можат самостојно да направат промена на трасата, истакна Лазо Митев, претседател на Советот на Општина Кочани.
На нешто повеќе од еден месен пред почетокот на сезоната за наводнување на земјоделските површини во Кочанско, веќе се санирани и исчистени близу 80 отсто од планираните 300 километри канали и земјени вади за кои е надлежна водостопанската подружница „Брегалница“. Чистењето на преостанатите канали е побавно токму поради узурпираните пристапни патишта и површини покрај бреговите на речните корита.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
