На дваесетина дена пред најавениот почеток на првенството во Втората фудбалска лига, ГФК „Осогово“ треба да добие дополнителна финансиска инекција од буџетот на Општина Кочани во висина од 1,2 милиони денари. Парите ќе бидат наменети за покривање на трошоците и плаќање на надоместокот за котизација за учество во лигата, а што секоја второлигашка екипа е обврзана да го уплати на сметката на Фудбалската федерација.
Предлогот за исплата на сумата од буџетот е веќе изготвен со измените и дополнувањата во Програмата за спорт на Општина Кочани за 2023 година, па наместо првичните 1.205.000, „Осогово“ треба добие вкупно 2.605.000 денари. Одлуката треба да ја потврди Советот на Општината на седница што ќе се одржи кон крајот на овој месец.
Од Одделението за јавни дејности на Општина Кочани потврдија дека поддршката за котизацијата во висина од 500 илјади денари е преку ставката за директна помош на клубот, а другите 700 илјади денари се преку ставката за распределба на клубови кои се класифицираат како екипни олимписки спортови.
Со дополнителната финансиска помош, кочанските жолто-сини, кои од оваа натпреварувачка сезона се повратници во Втората фудбалска лига, целосно ќе можат да ја платат котизацијата, а остатокот од сумата од општинскиот буџет да го планираат за другите трошоци.
Од Управниот одбор и Стручниот штаб на клубот пред почетокот на подготовките за настап во новото првенство нагласија дека главен приоритет ќе биде задржување на второлигашкиот статус, со пласман во средината на табелата. Со поддршката од општинскиот буџет за котизацијата, пред нив ќе има една пречка помалку во остварувањето на целта, а што ќе треба да се оправда на фудбалскиот терен.
Паралелно со добивањето финансиска поддршка од парите на граѓаните, спортската и воопшто јавноста во Кочани очекува поголема транспарентност од клубот, со отчет за работењето пред Советот, што не беше практика во изминатите години.
Покрај дополнителната помош за „Осогово“, со измените во Програмата за спорт за 2023 година, пред Советот на Општината се наоѓа и предлог за исплата на 70 илјади денари за организирање турнир во кошарка.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
