Граѓаните и правните лица кои користат вода за пиење од јавната водоводна мрежа во општина Кочани плаќаат по 48,79 денари за потрошен кубен метар вода, што е највисока цена во државата. Најниска цена за потрошената вода плаќаат жителите на Боговиње, само 7,5 денари за кубик, што е за 6,5 пати помалку од кочанци.
Освен во Кочани, најскапа вода се плаќа и во другите општини од Источниот регион – Делчево, Пробиштип и Берово, како и Свети Николе, додека најниска цена има за жителите на Полошкиот регион – Боговиње, Теарце, Желино и Врапчиште, а петта е општина Росоман кај Кавадарци.
Од друга страна, КЈП „Водовод“ кое стопанисува со мрежата, има финансиска загуба од 63,3 милиони денари, односно 1 милион евра, што е најголема од сите комунални претпријатија. Всушност сите останати претпријатија во државата имаат вкупна загуба од 3 милиони евра.
Просечната цена на кубик вода за пиење во земјава е 27,49 денари, што значи дека е за околу 45 отсто пониска од она што го плаќаат потрошувачите во Кочани.
Ова се податоците што на граѓаните на Кочани им се познати од поодамна, а коишто ги потврди и Центарот за граѓански комуникации од Скопје во истражувањето за состојбите со водата за пиење во државата, а што го објави денеска.
Три општини се издвојуваат според најголема потрошувачка на вода и тоа: Маврово и Теарце, каде домаќинствата трошат по 70 кубици месечно, како и Боговиње со 40 кубици месечно. Најмалку вода просечно месечно трошат домаќинствата во Старо Нагоричане, само по 2,4 кубици, а со мала потрошувачка, пониска од 7 кубни метри месечно се и Ранковце, Охрид, Чашка и Карбинци.
Во анализата е наведено дека во државата има 67 снабдувачи со вода за пиење и секој наплаќа различна цена за својата услуга. Најголем дел од нив имаат различни цени за „домаќинствата“ и за „останатите потрошувачи“, односно за правните лица – фирми и институции. Скоро половината од нив работат со финансиска загуба, додека загубата на вода кај поголем дел е над 40 отсто, односно годишно во државата се губат по 146 милиони кубни метри вода за пиење.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
