Општинската организација на Црвен крст од Виница денеска организираше свеченост по повод 14 јуни – Светскиот ден на крводарителството, на која беа доделени награди и признанија за најдобрите крводарители.
На прославата присуствуваа 26 рекордери со над стопати пати дарувана крв, од кои тројца со повеќе од 150 пати активно учество во крводарителските акции. Минатата година планот за крводарување е исполнет со 244 отсто, со што виничките хумани граѓани го продолжуваат долгогодишниот рекорд во државата и пошироко.
-Ние веќе пет децении сме најхумани и најуспешни во крводарителството, се гордееме со тоа, но истовремено ни е поттик да продолжиме со исто темпо. Реален проблем е иселувањето, односно што населението ни се намалува, но сепак успеваме да го одржиме позитивниот тренд. Виница е специфична и по тоа што нашите граѓани имаат семејни навики за доброволно дарување крв, односно цели семејства се рекордери, а традицијата се пренесува од родители, на деца, па на внуци. Работиме и ги мотивираме младите во училиштата, кои чекаат да наполнат 18 години за да можат да се вклучат во нашето големо крводарителско семејство, истакна Кирил Цоневски, секретар на Црвен крст – Виница.
На свеченоста признание за најдобар дарител за минатата година му беше доделено на Цанко Анастасов, кој одамна го надмина сопствениот рекорд од 150 крводарувања.
Признанија и честитки на крводарителите им упати и градоначалникот на Виница, Миле Петков, со порака да го продолжат хуманиот тренд и општината да остане рекордер во крводарителството.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
