Општинската организација на Црвен крст – Кочани вечерва организираше пригодна свеченост во рамки на одбележувањето на 5 Декември – Светскиот ден на волонтерството.
На средбата пред поголем број волонтери, активисти и поддржувачи на Црвениот крст, за историјатот на Движењето, за значењето на волонтерството и хуманите активности зборуваше Рената Спасова, волонтер во општинската организација. Присутните ги поздрави и Дејан Арсов, претседател на ОО Црвен крст – Кочани, кој истакна само дел од досега реализираните активности.
-Чест е да се биде дел од едно вакво големо хумано семејство на кое му се придружив од моите средношколски денови. И професионално, како припадник на Територијалната противпожарна единица, но и приватно сум вклучен во работата на Организацијата која бележи успеси и придонесува во давањето помош и поддршка на граѓаните на кои таа им е потребна. Верувам дека со вакви резултати ќе продолжи и во иднина, со оглед што во нашите редови имаме повеќе млади волонтери, кои несебично помагаат и се вклучени во различни видови активности, истакна Арсов.
Во рамки на свеченоста, на повеќемина долгогодишни волонтери и поддржувачи, како и на млади активисти им беа доделени благодарници за придонесот во работата на општинскиот Црвен крст.
Пред присутните гости беше прикажан и краток документарен филм во кој преку сеќавања и искажувања на повозрасни волонтери се презентираше ретроспектива во рамки на осумдецениското успешно работење на Организацијата.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
