По повод 14 јуни, Светскиот ден на крводарителството, Општинската организација на Црвен крст – Кочани организираше свечен средба со најдобрите крводарители од трите општини во кои дејствува.
Активноста е во рамки на заложбите за продолжување на успешната соработка со хуманите граѓани и за унапредување на крводарителството во регионот и државата. На најдобрите крводарители, кои се дел од хуманата заедница на Црвениот крст, им беа доделни признанија за придонесот во спасувањето човечки животи.
-Целта на овој настан е да им се оддаде почит на луѓето кои ја задоволуваат потребата од крв и крвни продукти, со што помаагаат во спасувањето човечки животи. На настанот им врачуваме признанија на повеќекратни крводарители, односно за пет, десет, 25, 50 и 100 пати дарувана крв, истакна Анета Коцева, секретарка на Црвен крст – Кочани.
Годинава признанието за крводарител рекордер му припадна на Евгенчо Милчевски кој досега 100 пати дарувал крв, а со таквата активност ќе продолжи и понатаму. Признанија за придонесот во крводарителството во општината добија и компанијата „Руен Инокс аутомобиле“, Службата за трансфузиона медицина од Кочани, Полициската станица, двете средни училишта, како и локалните медиуми.
Минатата година беше оценета како една од најлошите во поглед на крводарителството, не само во Кочани, туку и воопшто во државата, но сепак, од планираните 1.300 крвни единици, биле собрани над илјада.
©2023 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
