Под мотото „Чекориме за мир“ денеска Виница, заедно со уште неколку други градови од државата, се вклучи во одбележувањето на 21 септември – Светскиот ден на мирот.
По тој повод учениците од основните училишта „Гоце Делчев“, „Славчо Стојменски“ и „Никола Парапунов“, од Гимназијата „Ванчо Прке“, како и дечињата од детската градинка „Гоце Делчев“ по улиците во Виница организираа дефиле на мирот и пригодна програма во градскиот парк.
Во организирањето на активностите се вклучија тимовите за мировно образование во училиштата и градинката, а беа поддржани од Првата детска амбасада во светот „Меѓаши“ од Скопје.
-Светот интензивно се вооружува, многу воени конфликти, многу страдања на децата и мора да се мобилизира граѓанството за мир. Еве, со мотото „Чекориме за мир“ сакаме да упатиме јасна порака дека треба да се демилитаризира умот, да се демилитаризираат државите и општеството, зошто со трупање на оружје и создавање воени конфликти, некогаш и намерно, гинат невини жртви – децата. Никој не може за тоа да преземе одговорност затоа што не може да се врати детскиот живот, а притоа никој не одговара ни кривично, ни емотивно. Едноставно, ако не е создаваме култура за мирот од рана детска возраст не ќе можеме да создадеме одговорни граѓани кон светот и кон децата и нивните страдања, истакна Драги Змијанац, извршен директор и основач на Прва детска амбасада во светот “Меѓаши“.
На одбележувањето на Светскиот ден на мирот во Виница имаше и претставник од германската невладина организација “Curve Vostro“, која дава поддршка на активностите.
-Ние сме партнери на „Меѓаши“ во рамки на службите за граѓански мир, а целта на нашата програма во Македонија е градење мир и мировно образование. Исто така, една од целите којашто е потребна во мировниот процес се активности против етничката поделеност во општеството. Ја разбираме важноста на процесот на градење мир во училиштата во Македонија ја цениме соработката на двете наши партнерски организации, као и на сите училишта коишто активно учествуваат во градењето на мир и програмата за мировно образование, истакна Војтек Домаховски, директор и координатор на „Curve Vostro“.
Во рамки на свечената програма, ученици настапија со популарни музичко-сценски точки со мировни пораки.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
