– Во изминатава година извршивме целосна промена на водоводни азбесни цевки со полуетиленски на 12 улици со вкупна должина од 3698 метри. Во овој проект вложивме околу 6,5 милиони денари. Со помош на Министерството за транспорт и врски, кое вложи 14 милиони денари, го подобривме квалитетот на јавната водоводна мрежа во Виница, во иднина планирано е проширување на филтер станицата во градот на која треба да се приклучат сите 180 водомери од Лески на градскиот водовод. Ги поплочивме улиците “Крушевска Република“ и “Даме Груев“, повеќе краци од неколку улици во градот и тротоарот на излезот од Виница кон Берово. Поплочивме 5.450 метри квадратни со бекатон во градот и селата и инвестиравме 3,5 милиони денари. Ја подобруваме и патната градска инфрастриктура. Асфалтиравме и реновиравме 12 улици, а ги пополнивме и дупките на сите останати улици во општината. За оваа намена од буџетот на општината одвоивме 12 милиони денари. Го решаваме 10-годишниот проблем со водоснабдувањето на жителите во Лески. Ископани се 4 бунари кои треба да ги полнат капацитетите на постоечките резервоари. Извршена е санација на селски јаз под црквата “Св.Илија“ во Блатец. Пробиен е пат за пристапност до Маалска чешма во село Драгобраште, маало Криворамци. Изграден е потпорен ѕид во село Лаки. Направени се бушотина за вода за пиење во село Драгобраште, маало Чукарлии. Го решивме проблемот со бактериолошки неисправната вода за пиење во село Трсино. 730-те жители наскоро ќе добијат питка вода со проверен квалитет, рече Ивица Димитров, градоначалник на Општина Виница.
Во освртот за едногодишното работење, градоначалникот на Виница рече дека посебно внимание се посветува на унапредувањето на социјалната грижа и на подобрувањето на условите за младите.
–За основците, со помош на Министерството за образование и наука, градиме нова спортска сала во рамки на училиштето „Славчо Стојменски“. Проектот е проценет на 25 милиони денари. Во подрачното основно училиште „Никола Парапунов“ во Трсино поставени се 32 фотоволтаични панели кои ќе ни заштедат енергија. На интернатската зграда за деца со посебни потреби во Блатец поставуваме енергетско ефикасни фасади и ја менуваме дрвенаријата. Вредноста на инвестицијата е 33.750 евра, средствата се обезбедени од УНДП. Нашите планови се да изградиме социјална зграда за лицата од ранливите категории. Овој проект е влезен во финансискиот план во Министерството за труд и социјална политика. Го помагаме и дневниот центар за лица со посебни потреби. На 22 студенти со низок социјален статус им доделивме стипендии во висина од 2.200 денари во времетраење од 9 месеци, додаде Димитров.
Димитров нагласи дека за развојот на спортот и унапредувањето на културата инвестирани се над 2,5 милион денари, а за одржување на комуналната хигиена и за набавка на ровокопач за комуналното претпријатие се инвестираат над 5 милиони денари.
Градоначалникот на Виница потенцираше дека во изминатиот едногодишен период е намалена цената на водата за пиење и таа е најниска во државата.
Во моментот активностите на Општината се насочени кон изработка на детални урбанистички планови за повеќе локалитети, како и на техничка документација за кружен тек во централното градско подрачје и за реконструкција на кино салата.
Т. Ајтовски
{fshare}
{backbutton}
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
