Во чест на сите семејства што изгубивме сѐ, денеска повторно чекориме, не затоа што сме ја преболеле болката, туку затоа што болката ја претворивме во сила, чекориме по пат што никој од нас не го избра, но тој пат ни стана света должност затоа што чекориме во име на нашите 63 ангели чија светлина не може да ја изгасне ни времето, ни неправдата, ни тишината, рекоа родителите на загинатите во „Пулс“ на 28. „Марш за ангелите“ што се одржа во Кочани.
Колоната која во 15:05 часот тргна од Паркот на Револуцијата кон Трговскиот центар, а оттаму кон Управата за јавни приоходи и Полициската станица, запре на кружниот тек кај двојниот мост на булеварот „Стево Теодосиевски“, каде имаше кратка блокада на сообраќајот.
-Ние ја носиме тежината што не се гледа, но ја чувствува секој што ќе нѐ погледне во очи. Таа тежина не се мери во килограми, туку во молк, во непреспиени ноќи, во празни родендени, во фотографии што не стареат. Но, и покрај неа, стоиме исправени. Денеска не зборуваме, врескаме со глас што доаѓа од најдлабоката болка, од празнината што не се полни, врескаме во име на нашите 63 ангела. Од болката за нив никна најсилната љубов, најцврстата вера и најчистата решителност – вистината мора да излезе на виделина. Од нивната трагедија никна народ што повеќе не се плаши да бара правда. И токму затоа, денес сѐ уште чекориме, чекориме за еден ден да можеме да кажеме – Македонија по нив стана поинаква, побудна, посвесна, побезбедна токму благодарение на нив, затоа што тие нѐ научија колку е кревок животот и колку е скапоцен. Затоа сме тука, да кажеме на цел глас, без страв и без молчење – нивната жртва не смее да биде залудна! Но, дали само нашиот глас е доволен? Зарем не треба да е тоа гласот на луѓето од цела Македонија, гласот што бара одговорност, глас од народот што не се плаши да ја погледне вистината во очи и да каже – доста беше неказнетост, доста беше корупција, доста беше молк, истакна Манта Стоименова, мајка чиј син настрада во трагедијата.
Родителите на починатите побараа сите кои знаат дека се виновни да си ја признаат вината, без разлика дали се обвинети или не, а наместо да се кријат зад прес конференции, трибини и митинзи со лажни насмевки, да ја наведнат главата и да признаат дека згрешиле.
Потоа учесниците на Маршот се упатија кон Основниот суд – Кочани на чија ограда оставија дел од транспарентите со лијковите на загинатите во пожарот во „Пулс“. По едноминутниот молк колоната од семејствата и граѓаните кои им даваат поддршка во барањето правда се врати на почетната позиција во Паркот на Револуцијата.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
