По околу едномесечна пауза, граѓаните на Кочани денеска излегоа на 37. „Марш за ангелите“ што го организирше Здружението „16 март 2025 Кочани“, а на кој беше изразен револт од текот на судскиот процес за трагедијата во „Пулс“.
Маршот почна од Паркот на Револуцијата, продолжувајќи низ Трговскиот центар, пред Управата за јавни приходи и Полициската станица, а силни пораки беа упатени пред зградата на Основниот суд и Јавното обвинителство.
Пред присутните се обрати претседателот на Здружението, Александар Наунов критикувајќи ги правосудните органи, потсетувајќи на првичните ветувања на судиите и обвинителите дека ќе има по две рочишта неделно и строга контрола врз медицинските оправдувања на обвинетите.
-Денес прашуваме: каде се тие ветувања? Гледаме одложувања, гледаме оправдувања. Во месец јануари се одржа само едно рочиште. Во февруари досега се одржаа две, а до крајот на месецот е закажано уште едно — ако воопшто се одржи. И токму затоа прашуваме: каде е ветената динамика? Каде е најавеното темпо од две рочишта неделно? Гледаме обвинети кои одеднаш, од здрави, стануваат „болни“ и доставуваат медицинска документација за која ние не знаеме дали е основана или не. А тоа кај нас буди сомнеж дека ваквите дејствија се во насока на одолговлекување на постапката. Слушаме информации за привилегии што не смеат да постојат. На првоосомничениот му е пронајден телефон во ќелијата — и сè завршило со опомена. Се поставува прашањето: дали навистина се врши редовна контрола во притворот? Што се случува со телефоните на првоосомничениот? Дали се обработени до крај и дали од нив е извлечена целата можно достапна комуникација? И уште поважно – дали е прифатливо лице осомничено во ваква трагедија да помине само со опомена, или требаше директно да следи казна со краток престој во самица, праша Наунов.
Дополнително, беше посочен и случај на сведок кој во суд дал изјава различна од онаа во Обвинителството, притоа јавно обвинувајќи дека обвинители го менувале текстот во неговата првична изјава.
-Обвинителството лично утврди дека изјавата дадена пред нив е сосема различна од онаа дадена во суд. Тоа е кривично дело. Дали е покрената постапка? А и дополнително, истиот сведок јавно обвини дека текстот во неговата изјава бил изменет од обвинители. Дали ова е документирано, проверено и процесуирано? Јавноста има право да знае. Или и ова ќе помине незабележано? И за сите оние кои однапред тврдат дека случајот „Пулс“ бил толку „климаво поставен“ што ќе паднел — нека запомнат нешто: под тие скали не лежи предмет, не лежи бројка, не лежи статистика. Под тие скали лежат 63 млади животи. 63 недоискажани соништа. 63 светови што згаснаа за миг. 63 семејства што никогаш повеќе нема да бидат цели, додаде Наунов.
Од Здружението порачаа дека нивното трпение е при крај и побараа итно исполнување на ветената динамика и правда без компромиси. „Ако ветивте правда – испорачајте ја,“ беше завршната порака од денешниот протестен марш во Кочани.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
