Викендов почнаа активностите во рамки на програмата од Меѓународниот фолклорен фестивал „Истибањско здравоживо“, што годинава се одржува по триесет и осми пат.
Организатор и домаќин на фестивалот е фолклорниот ансамбл „Китка“, а учествуваат околу 400 фолклористи од десетина домашни и групи од странство. На почетокот се одржа свечено дефиле низ Истибања на кое беа претставени учесниците, а потоа на сцената во училишниот двор секој од ансамблите имаше десетминутен настап.
Фестивалот го отвори градоначалникот на Општина Виница, Миле Петков, посакувајќи им на учесниците добар престој и успешен настап пред публиката.
-Меѓународниот фолклорен фестивал „Истибањско здравоживо“ е од огромно значење за нашата општина и држава. Големата посетеност и заинтересираност да се види и слушне фолклорот, како на македонските изведувачи, така и на оние од странство, е доказ дека успешно ја одржуваме традицијата и претставува мотив за уште подобра организација во иднина. Општина Виница постојано е со овој фестивал затоа што го препознава значењето на негувањето на културната традиција, а особено радува интересот на младите генерации за фолклорот, обичаите и народните песни и ора, со што продолжува зачувувањето на трајните вредности на нашиот народ, истакна градоначалникот Петков.
Учесниците и присутните на фестивалот ги поздрави и претседателката на Асоцијацијата на фолклорни фестивали – ЦИОФФ за Македонија, Мирјана Мирчевска.
-Сакам да изразам огромно задоволство што Фестивалот цели 37 години, оваа е триесет осма. Се одржува со огромен ентузијазам на ФА „Китка“ и неговиот претседател Стојло Митковски кои вложуваат голем труд и ова се реализира на овој начин. На сите гости им поскаувам да се дружат и запознаваат, а со тоа да дознаат за културите и традициите на државите и народите кои живеат во нив, истакна Мирчевска.
По настапот во Истибања, учесниците на фестивалот се претставија и пред публиката во Зрновци, а завршниот концерт е закажан за в среда попладне на плоштадот „Ангел Винички“ во Виница.
Покровител на меѓународниот фолклорен фестивал „Истибањско здравоживо“ е Општина Виница, а манифестацијата се реализира со финансиска поддршка од Министерството за култура, стопански претпријатија и наши иселеници во странство.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
