5 јуни на глобално ниво се одбележува како Светски ден на животната средина, а основна цел е да се поттикнува и охрабрува населението и одговорните институции да преземаат чекори за заштита на природата и да водат грижа за планетата.
Во Кочани овој ден по ништо не се разликува од останатите во намалувањето на загадувањето на воздухот и нарушувањето на природниот баланс. Посебен придонес за тоа има интензивното чадење од депонијата кај Бели, а негативните параметри за амбиенталниот воздух во нејзината околина тешко можат да се измерат. Без позитивен резултат остануваат реакциите, протестите и апелите на жителите од селото кои повикуваа да се преземат мерки за гаснење огнот.
Затрупувањето на отпадот со земја и третманот со морски алги, пред неколку години се покажа како вистинско решение, а чадот го снема. Во меѓувреме работите се променија и состојбата повторно е по старо.
Пред околу една година Советот на Општина Кочани донесе одлука да се набават две мерни станици за следење на загаденоста на воздухот, што беше и едно од барањата на граѓанските инцијативи за заштита на животната средина. Локалната самоуправа оваа одлука досега ја нема реализирано. Како извесна замена за тоа на последната седница побара советниците да дадат согласност за примање донација од граѓанско здружение од Скопје, кое сака да донира 5 сензори за мерење на квалитетот на воздухот. Вредноста на донацијата е 60 илјади денари. Останува дилемата дали општинскиот буџет е толку тенок за да не може да се реализира набавката на двете мерни станици.
Одбележувањето на 5 јуни во Кочани го карактеризира и одржувањето на јавната чистота што има очигледен пад, а одговорните како воопшто да не ги засегаат ни јавните поплаки на социјалните мрежи, ниту директните – кај надлежните служби. Преполнетите контејнери и корпи за отпадоци се секојдневна слика со која тие не можат да се изборат, а епитетот за најчист град се загуби и во сеќавањата на повозрасните сограѓани.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
