На падините на Осоговските Планини во неделата се одржаа првите натпревари во одење со планинарски стапчиња Nordic snow trail и во планинско трчање Nebojani trail 2024, чиј организатор беше клубот за планинарски спортови „Осоговски орел“ од Кочани.
Зимските услови со снег и ниските температури не беа пречка настанот да помине според планираните содржини и маршрута.
Кружната патека на трката во планинско трчање, во должина од 19,5 километри, имаше стартна позиција од месноста Крушка во правец на селата Ново Село и Небојани и назад. Висинската разлика меѓу најниската и највисоката точка изнесуваше 900 метри, а според конфигурацијата на теренот натпреварувачите мораа да поминат повеќе угорнини и надолнини по обележана патеката што во најголем дел е земјена. Контролниот пункт беше во училиштето во село Небојани, каде имаше чај и освежителни пијалоци за натпреварувачите.
На трката учествуваа 31 натпреварувач од повеќе градови во државата, а првото место во машка конкуренција го освои Златко Николов, кој патеката ја помина за 1 час и 44 минути, пред Никола Павлов и Срѓан Милошевски кои заостанааа две, односно три минути зад него.
Во женска конкуренција најбрза беше Марија Пеликон која истрча за 2 часа и 9 минути, второто место ѝ припадна на Валентина Узунова со 2 часа и 24 минути, а третопласирана беше Валентина Павловска која ја помина патеката за 2 часа и 31 минута.
Најмлад натпреварувач на трката беше седумгодишната Марта Ивановска, а најстар учесник беше 72-годишниот Бале Брзи. За нив, како и за најдобрите на трката организаторот обезбеди награди и признанија.
Трката во брзо одење со планинарски стапчиња Nordic snow trail 2024 се реалзираше на истата маршрута од 19,5 километри, имаше ревијален карактер и за неа беа пријавени 52 учесници во машка и женска конкуренција. На сите натрпеварувачи кои успешно ја завршија им беа доделени признанија.
Во рамки на настанот имаше организирана забава со диџеј, ручек и освежителни пијалоци, како и придружни содржини со велосипедска тура, а беа поделени флаери со едукативни содржини за промоција на планинарењето.
Реализацијата на двете трки беше со поддршка од бизнис сектрот од Кочани и регионот, за што членовите на КПС „Осоговски орел“ упатија посебна благодарност, при што беше најавено дека настанот ќе стане традиционален.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
