Во организација на Општина Зрновци и Локалниот младински совет денеска почна вториот меморијален турнир во мал фудбал „Синиша Стоилов“.
На мултинаменското спортско игралиште „Васе Ангелов“ во Зрновци фудбалските вештини ќе ги одмерат 12 екипи од четирите соседни општини во регионот, кои во наредните десетина дена ќе се натпреваруваат за осовојување на победничкиот пехар.
-Со организирањето на турнирот, што добива традиционален карактер, го одржуваме споменот на загинатиот армиски капетан Синиша Стоилов. Годинава имаше одличен интерес за учество и се пријавија екипи од општините Зрновци, Кочани, Виница и Чешиново-Облешево. Тие се поделени во четири групи и ќе играат по систем на елиминации, а финалето е закажано за в сабота, 10 јуни, на повеќенамеснкото игралиште во Зрновци, истакна Борчо Коцев, градоначалник на Зрновци.
Придонес во организацијата на турнирот даваат и членовите на Локалниот младински совет на Зрновци.
-Овој настан е дел од нашата годишна програма за спортски активности, а радува тоа што во составот на екипите има голем број млади играчи. Очекуваме добра игра на сите екипи, а најдобрите заслужено да ги добијат признанијата, истакна Елена Ристова, претседателка на Локалниот младински совет од Зрновци.
Организаторите на турнирот обезбедија награди за најдобрите во поединечна и екипна конкуренција, при што признанија ќе добијат најдобриот голман, најефикасниот стрелец и најдобриот играч, како и за екипата победник.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
