Општина Кочани почнува постапка за реализација на неколку инфраструктурни зафати со кои ќе се подобруваат условите за земјоделските производители и за другите граѓани. Се работи за чистење одводни канали, прочистување на Оризарска Река, како и за пробивање земјен пат во месноста Цацков Бунар кај Тркање и порамнување и тампонирање на полски пат во локалитетот Мал Орман во атарот на Оризари.
Веќе е објавен јавен повик за избор на изведувач на работите, а се планира за комплетирање на инфраструктурните активности да се инвестираат над 2,5 милиони денари. Средствата се обезбедени од општинскиот буџет, во рамки на Програмата за заштита на животната средина и природата во 2023 година, за која претходно беше добиена и согласност од Советот на Општината. Набавката е сукцесивна и треба да се реализира во период од три месеци.
Според техничката спецификација, со механизација и рачно треба да се исчистат одводни канали во Горни Подлог во вкупна должина од 1.200 метри, при што да се отстранат наносите од земја, трева и трска. Ќе се работи и на прочистување на коритото на Оризарска Река од дрвја, грмушки и отпаден материјал, а потоа ќе се изведе машинско порамнување со грејдер.
Со интервенцијата во локалитетот Цацков Бунар, ќе се пробие и тампонира пат што ќе овозможи пристап до стопанските објекти во околината на компанијата „Амфенол Технолоџи Македонија“, како и до земјоделските површини во тој дел на атарот на Тркање. Треба да се пробие и тампонира коловоз во должина од 425 метри и ширина од четири метри. Исто така, ќе се отстранат постојните и ќе се постават нови цевкасти пропусти за вода, со пречник од 800 милиметри и должина од 21 метар.
Во локалитетот Мал Орман во атарот на Оризари пак, ќе се работи на порамнување и тампонирање на полски пат од месноста Пруга кон земјоделските површини. Вкупната должина на делницата е 300 метри, а ширината 3 метри.
Пријавувањето на заинтересираните изведувачи на градежните работи е до 29 јуни, а по изборот на најповолниот понудувач, реализацијата треба да почне во текот на летниот период.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
