Советот на Општина Чешиново-Облешево дава поддршка на инцијативата за можно збратимување со италијанската општина Кастањоле деле Ланце.
На 49. седница на Советот, на која се разгледуваше предлогот за воспоставување поблиска соработка, а од која би произлегло и збратимување, беше нагласено дека голем процент од населението во овој италијански регион се македонски граѓани, главно од источниот регион.
Интерес за соработка имало и од италијанската страна, а можноста за контакт се гледа при престојот што градоначалникот на Кастањоле деле Ланце идната недела ќе го има во Штип.
-Ако се донесе оваа одлука или препорака, ќе им дадеме знак дека сме зианитересирани за побратимување. Како што реков, градоначалникот на Кастањоле имал агенда за 24 март во Штип, а идејата за побратимување е од самиот градоначалникот на Кастањоле. Тука треба нашиот градоначалник, со директорите на училиштата, општинската администрација, да се види дали ќе бидеме во можност тоа да го реализираме. Како што кажа и директорот на училиштето, една третина од населението се Македонци од овој крај, нашиот, кочанскиот дел, и веројатно ќе има и економски бенефит за нашата општина, истакна Сане Стојанов, член на Советот на Општина Чешиново-Облешево.
Иницијативата за поблиска соработка има и граѓанска поддршка, што се поткрепува со фактот дека голем број нашинци живеат и работат во тој италијански регион.
-Една третина од учениците кои се таму во основно образование се Македонци по потекло, така што добра е можноста што градоначалникот ќе биде тука, во Штип, и да се воспостави еден линк и да се видат можностите колку ние како општина можеме таму да најдеме интерес, да бидеме збратимени или да најдеме каква било соработка со таа општина. Има голем број Македонци, и сигурно ќе има интерес и од нивна страна, се работи за наши граѓани, од овие краеви, кои таму веќе опстојуваат со втора генерација, истакна Јорданчо Костадинов, директор на ОУ „Климент Охридски“ од Облешево.
Градоначалникот на Чешиново-Облешево нагласи дека иницијативата е добра, но постои процедура и протокол според кои се прави збратимување, поради што не треба да се носат предвремени заклучоци дека до тоа и ќе дојде.
-Со две општини имам склучувано договори, и како советник и сега како градоначалник и ги знам тековните работи. Иницијативата од ваша страна е добра и ви благодарам, но ќе кажам дека не можам да ветам дека тоа ќе се реализира. Да, ќе се обидеме, но тоа ќе зависи од целата ситуација. Тука има и документи, размена на меморандуми за соработка, па официјално потпишување, што значи дека тоа не е туку-така, едноставно. Во секој случај, добро е и ви благодарам, истакна Далибор Ангелов, градоначалник на општина Чешиново-Облешево.
Општината Кастањоле деле Ланце се наоѓа во провинцијата Асти, на половина пат до градот Алба во регионот Пиемонт, во северниот дел на Италија. Во неа живеат околу 3.600 жители, кои главно се занимаваат со земјоделство, односно лозарство и производство на вино.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
