Општинската организација на Црвен крст –Кочани на свечен настан по повод Светскиот ден на крводарителството денеска ги врачи признанија на повеќекратните крводарители од општините Кочани, Зрновци и Чешиново-Облешево.
На свеченоста беа доделени благодарници на крводарители за 5, 25, 50, и 100 пати дарувана крв, како и на поддржувачи и на унапредувачи на крводарителството.
Годинава признанието за 100 пати дарувана крв му припадна на Тиме Златков од селото Тркање, Кочани при што Црвениот крст му врачи благодарница, плакета и традиционален подарок телевизор.
-Многу е убаво чувството да се дарува крв, притоа знаејќи дека со тоа спасувате живот. Почнав да дарувам крв подоцна, на 30 годишна возраст, но успеав да стигнам до бројката над 100 пати. Имам 104 дарувања. Здраво се хранам и живеам здрав живот. Јас сум А позитив крвна група. На сите млади им препорачувам да даруваат крв бидејки утре може да ни затреба на секој од нас, рече Тиме Златков, крводарител со над 100 пати дарувана крв.
Настанот се реализираше по повод 14 јуни – Светскиот ден на крводарителството, а годинава поради трагедијата во Кочани истиот се реализираше подоцна.
-Овие признанија не се само признанија и бројки, ова се спасени човечки животи, ова е дадена надеж таму кадешто е најпотребна. Со денешниот ден сакам во името на Црвен крст Кочани да изразам благодарност на сите хумани луѓе кои придонесуваат за солидарноста и хуманоста во нашата заедница со дарувањето на крв. Дарувањето не е само хуман гест, тоа е начин на живот. Треба да бидеме благодарни на овие луѓе и исто така да биде како инспирација и за други луѓе да се приклучуваат во хуманото семејство на крводарители кое треба да се шири, рече Анета Коцева, секретар на Црвен крст – Кочани.
На локално ниво, општинскиот Црвен крст минатата 2024 година реализираше вкупно 19 крводарителски акции. Од нив 12 редовни и традиционални, секој последен четврток во месецот во просториите на Црвен крст – Кочани, три во соработка со кочанската полиција, две во Општина Зрновци, една младинска акција и една акција во компанијата „Руен Инокс Аутомобиле“. Во 2024 година собрани се вкупно 1.018 крвни единици.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
