Вкупен износ од околу 128 милиони денари или 2,1 милиони евра, што претставува 18,15 отсто од вкупниот годишен буџет, издвоила Општина Кочани за спроведување на јавните набавки во текот на 2024 година. Тоа претставува намалување за 23,3 отсто во однос на претходниот едногодишен период.
Лани биле реализирани вкупно 83 јавни набавки, а во просек по 4.043 денари по жител на општината се потрошени за оваа намена, што е за околу 1.200 денари помалку во однос на 2023 година, покажува истражувањето што го спроведе Центарот за граѓански комуникации од Скопје.
Најмногу пари од општинскиот буџет, вкупно 26 милиони или 20% од јавните набавки во текот на минатата година биле исплатени на ЕСМ Продажба ДООЕЛ – Скопје за набавка на електрична енергија. Со ваквиот износ, Кочани е трета општина во државата, после Скопје и Прилеп, според исплатата кон овој добавувач.
На листата на фирми со кои биле склучени договори за јавни набавки, според висината на исплатените средства следуваат Стоименов – Кочани со 17,2 милиони, Коле-транс инженеринг од Штип со 14,5 милиони и Калина ДООЕЛ – Оризари со близу 10,4 милиони денари, кои работеле на инфраструктурни проекти, главно во сообраќајната инфраструктура.
Околу 43,7 отсто од парите за јавни набавки Локалната самоуправа на Кочани ги потрошила за изведба на градежни, инсталатерски и друг вид работи, 34 отсто се за набавка на стоки, а 24,3 отсто им се платени на добавувачи кои извршиле разни услуги за потребите на Општината и нејзините институции.
-Во текот на 2024 година Општина Кочани на располагање во буџетот имала 703 милиони и 967 илјади денари, а нејзиниот вкупен удел во реализираните јавни набавки на ниво на држава изнесува 1,09 отсто. Дури една четвртина од вкупната вредност на локалните тендери завршила кај само 10 фирми, се наведува во истражувањето на Центарот за граѓански комуникации.
Податоците од истражувањето покажале дека со околу 1 милион евра повеќе во однос на 2023 година Виница е во групата од 15 општини во државата со најголем пораст на износот потрошен за јавни набавки. Локалните самоуправи на Зрновци со 449.680 денари и на Чешиново со потрошени помалку од 400 илјади денари се меѓу општините во државата кои издвоиле најмалку за оваа намена.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
