Барањето на КЈП „Водовод“ за покачување на цените на водата за пиење и на другите комунални услуги не доби поддршка од Советот на Општина Кочани. Според доставените податоци, предложено беше цената на водата за домаќинствата од 45,18 денари за кубен метар да се зголеми на 49,7 денари, надоместокот за канализација од 13,33 денари да изнесува 21,20 денари, а за пречистување на отпадните води од 15,17 денари за кубен метар да скокне на 17,4 денари. Од комуналното претпријатие бараат да се покачи и цената на водата за фирмите, при што од 54,83 денари да изнесува 60,3 денари, канализацијата да поскапи од 18,41 денар на 32,2 денари, а надместокот за пречистување на водите да се зголеми од 15,17 денари на 17,4 денари.
Во образложението за барањето, директорот на „Водовод“ истакна дека можеби и ова поскапување нема да помогне да се покријат трошоците и загубите во претпријатието, префрлувајќи дел од вината и на вработените.
Оправдувањето на директорот на „Водовод“ не наиде на одобрување од советниците кои му забележаа дека со ваков начин на раководење претпријатието ќе продолжи да тоне и да бележи загуби.
На гласањето по точките за финансикото работење во текот на минатата и во првите три месеци од оваа година, како и за барањето за покачување на цените на услугите мнозинството советници беа против или воздржани.
Градоначалникот Папазов пак, не даде никаков коментар за состојбите во „Водовод“ и дали ќе го реализира барањето на советниците за смена на првиот човек на претпријатието.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
