Здружението „Еко Тим Исток“ организираше завршна презентација на која ги претстави активностите од проектот „Запознај ги убавините на општина Кочани“ што се реализираше во изминатите 12 месеци, а чија цел беше преку креирање разновидна туристичка понуда да се промовираат културно-историското наследство, природните убавини и гастрономијата на општината.
Целна група на проектот беа дваесетина жители на општината, од кои 14 ќе бидат идни промотори на туризмот, како и креатори и реализатори на конкретни туристички тури.
-Кога пред една година го почнавме проектот, ние како Здружение не ни бевме свесни со што сè од богатство од знаменитости, културно-историски и верски објекти, како и културни манифестации располага општина Кочани. Меѓутоа, на наше огромно задоволство, на повикот за вклучување лица кои ќе бидат промотори на туризмот во општината се пријавија луѓе коишто практично се жива енциклопедија и познавачи на секое парче земја во општината. Нивното знаење, заедно со нашето искуство во делот на промоција на туризмот, креирање и реализирање на туристички понуди, се одлична основа за идно развивање и промовирање на културно-историскиот, верскиот туризам и гастрономијата во општина Кочани. Иако во моментот имаме направено само неколку туристички понуди, тимот располага со капацитет за креирање и реализирање на огромен број понуди наменети за различни категории луѓе, различни возрасни групи, како и различна физичка подготвеност, истакна Ирена Мирчовска, координаторка на проектот.
На презентацијата беше нагласено дека со проектот се идентификувани и развиени 30 локални туристички можности, зголемена е видливоста на потенцијалите за културно-историски и верски, како и гастрономските капацитети преку креирање онлајн промотивен електронски каталог, а исчистени и доуредени се три туристички локалитети во општината.
Се очекува по завршувањето на пректот да се привлечат и туристи од странство.
-Ми беше огромно задоволство да бидам дел од овој проект. Тоа беше едно прекрасно дружење со многу интересни луѓе коишто имаат огромно знаење за Кочани и околината. Јас после 33 години живеење во странство, бев овде оваа година, и за среќа бев дел од овој проект и мислам дека потенцијалот на општината и на Осоговските Планини за туризам е огромен. Многу сум среќна што организираме нешто за да привлечеме, се надевам, и туристи од странство. Мислам дека во Лондон има интерес за ваков неоткриен дел на
Европа и мислам дека откако го направивме проектот ќе биде привлечно како понуда и во странствп, истакна Марија Едровска, учесничка во проектот и промоторка на туризмот.
Проектот „Запознај ги убавините на општина Кочани“ се реализирше во партнерство со Здружението на бизнис жени од Скопје, а во рамки на „Регионалната програма за локална демократија на Западен Балкан 2 – ReLOaD2“, финансиран од ЕУ и кофинансиран од Општина Кочани, а спроеведуван од Програмата за развој на Обединетите нации – УНДП.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
