Општата болница со проширена дејност – Кочани доби најсовремен електрохируршки генератор на јапонскиот производител Olympus, што како донација го обезбеди Сојузот на Лајонс клубови на Северна Македонија – Д132 од Скопје.
Се работи за уред што овозможува прецизно и контролирано сечење на ткивото при оперативни зафати и коагулација на крвта, што на медицинскиот тим му дава стабилна и безбедна енергија при различни хируршки интервенции. Генераторот се користи во секоја гранка на хирургијата – од општа хирургија, урологија и гинекологија до реконструктивни и специјализирани интервенции.
На предавањето на опремата присуствуваа претставници од Сојузот на Лајонс клубови, како и од кочанската здравствена установа.
-Донацијата е од срце, од нашите 30 клубови и околу 700 Лајонс членови. Ние сме сите волонтери, обични граѓани кои сакаат да дадат онолку колку што можат од себе за доброто на нашите сограѓани. Имавме исклучителна помош од нашите Лајонс пријатели од Словенија, Хрватска, од далечна Австралија и од компанијата „Некст медикал“. Сигурна сум дека во овој апарат ќе ви овозможи уште подобро да ги искористите вашите, веќе докажани, високи стручни перформанси и во третманот на пациентите во Кочани и во регионот, истакна Маја Костовска, гувернер на Лајонс дистриктот Д132 – Македонија.
-Денеска имам чест и задоволство да го преземеме новиот апарат за Одделението за хируршки болести, тоа е електрохируршки генератор којшто ни е донација од Лајонс интернешенал клуб со здружени сили значи, како што кажаа претходно дека ни се овозможи да имаме да го имаме овој апарат во кочанската болница којашто морам да кажам дека претставува прва болница во до источната граница, којашто го покрива овој регион и се надевам дека во иднина ќе ни послужи за изведување на посложени хируршки интервенции во болницата, истакна Катерина Паниќ Мирчовска, директорка на Општата болница со проширена дејност – Кочани.
Од компанијата „Некст медикал“ истакнаа дека се работи за најсовремен уред што се користи во хирургијата и ќе може да се користи и при натамошните интервенциите кај повредените во „Пулс“.
-Овој модерен електрохируршки генератор со висока технологија СГ410 на „Олимпус“ овозможува широка примена во сите области, покрај во отворената хирургија, гинекологија, урологија, лапароскопија, исто така и во други интервенции, како што се и ендоскопските. Во однос на тоа што овој електрохируршки генератор би помогнал, конкретно за пациентите коишто беа засегнати во пожарот во Кочани, тој е со автоматизирана енергија ни овозможува приспособување на енергијата според ткивото, со цел концизно, точно и прецизно отстранување на оштетените делови коишто понатаму ќе бидат погодни за трансплантација на нова кожа, истакна Жана Хаџи Поповска, регионален менаџер во „Некст медикал“.
Од Сојузот на Лајонс клубови на Македонија нагласија дека во донирањето на опремата се вклучиле и нивни колеги од други држави.
-Во Вуковар имавме заедничка акција кога дознавме за несреќата во Кочани и тоа сите ги потресе во регионот. Од Бугарија даруваа крв, а „лајонсите“ од Словенија и Хрватска финансиски го помогнаа во голем дел овој проект заедно со членовите на нашите клубови. Благодарност за сите членови на Лајонс клуб во Македонија, Хрватска, Словенија и насекаде, исто така да не ги заборавам од Австралија, коишто несебично донираа средства за овој апарат. Се надевам дека ќе послужи за неговата основна дејност и би сакале после некое време добиеме информации какви се бенефитите од целата работа, истакна Харалампи Коцев, поранешен гувернер во дистрикт Д132 – Македонија.
Новиот апарат помага во третман на пациенти со изгореници, односно овозможува прецизно отстранување на оштетеното ткиво, намалување на крварењето и создавање чиста површина подготвена за кожни трансплантации со пократко време на интервенција и минимална траума на здравото ткиво.
Сојузот на Лајонс клубови -Д132 во Македонија постои од 1997 година, во дистриктот членуваат 30 Лајонс клубови со околу 600 членови – волонтери.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
