Комуналното јавно претпријатие „Водовод“ од Кочани почна проект со кој ќе замени постојни или ќе инсталира нови водомери на 350 семејства во социјален ризик, кои бесправно се приклучиле на водоводната мрежа.
Замената или инсталацијата на уредите ќе трае до 15 ноември, а наместо редовниот надоместок за инсталирање, во висина од 8.500 денари, корисниците имаат обврска да платат само 50 денари, за што претходно беше добиена и согласност од Советот на Општина Кочани.
-Во рамки на проектот „Намалување на загубите на вода во водоснабдителниот систем и искористување на соларната енергија во јавното комунално претпријатие во општина Кочани” ги повикуваме сите заинтересирани граѓани, кои потекнуваат од семејства во социјален ризик, да се пријават во Центарот за корисници на „Водовод“ заради промена или инсталирање водомер во нивното место на живеење. Доколку не постои водомер, истиот е неисправен, закочен, стопен и слично, кај овие корисници ќе бидат инсталирани нови водомери што се набавени во рамки на проектот. Сопствениците на објектите се должни да ги обезбедат сите технички услови за непречено инсталирање, се истакнува во повикот од КЈП „Водовод“.
Замената или инсталирањето на уредите за мерење на потрошувачката на вода е со цел да се спречат загубите и неевидентираната потрошувачка од водоснабдителниот систем.
Во рамки на проектот ќе се постават две фотоволтаични централи со моќност од 120 и 440 киловати на кровот на станицата за пречистување на отпадните води кај селото Мојанци. Предвидена е и обука за персоналот што ќе ракува со опремата за производство на струја, а крајната цел на инвестицијата е да се намалат износите на сметките за вода за граѓаните на Кочани.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
