На површините на Институот за ориз во Кочани денеска беше организирано традиционалното рачно зажнејување во рамки на манифестацијата Денови на кочанскиот ориз.
Членови на Здружението на пензионери – Кочани со срп во рака и со благослов за добар принос ги ожнеаа првите снопови и официјално го означија почетокот на овогодишната жетвена сезона.
-Да бидеме живи и здрави, да бидеме среќни, да има мир и соживот меѓу луѓето. Овој ден е празник за Кочани и за кочанскиот ориз, за кочанското бело злато. Да има добар род, да има добар откуп и добра цена. Да сме живи и здрави, за многу години и наздравје, рече еден од повозрасните жетвари.
Поради трагичниот пожар од пред шест месеци, овогодишното зажнејување беше симболично, без присуство на гости и официјални делегации, како и без музичка програма.
Присутните на настанот ги поздрави в.д. градоначалникот Венко Крстевски при што го додели и признанието за најдобар оризопроизводител што го доби Ленче Стојанова, која во 2024 година има 55.450 кг предадена арпа и поседува 46 ха земјоделско земјиште.
-Постарите генерации најдобро знаат, посебно оние коишто живееле во Југославија, дека Кочани како најголем производител на оризот во Источна Европа своевремено ги снабдувал потребите на целата држава. Во денешно време, за жал, таа традиција полека се губи, меѓутоа има позитивни примери, како што е Ленче Стојанова на која во оваа прилика сакам да ѝ ја честитам заслужено добиената награда и посакам успеси во понатамошната работа. Ова претставува вистински и позитивен пример дека и жените имаат свое место во земјоделието и пример дека можат рамноправно со мажите да се борат на секое поле. Ова е одлуката за најуспешен оризопроизводител, да посакам успеси во понатамошната работа, да бидете светол пример и за другите жени, да го следат вашиот пат и се надевам дека следните години ќе имаме што е можно поголеми приноси во оризот и подобра откупно цена, истакна Крстевски.
Наградената Стојанова нагласи дека признанието е дополнителен мотив да продолжи со земјоделство и да постигнува што подобри резултати.
-Се занимавам со земјоделие повеќе од две децении, обработувам површина со ориз околу 20 хектари. Оризот е една благородна култура којашто ја обработуваме со генерации, ја имам наследено од моите предци коишто исто така се занимавале со ориз и должност ми е да ја пренесам и на моите идни поколенија, истакна Стојанова.
На рачното зажнејување на оризот присуствуваа и неколку земјоделци кои дошле да проверат дали нивните ниви се подготвени за жетва.
-Треба да биде, се надеваме, ќе биде мачно, многу вода, дожд падна и повисоките семиња, конкретно „сан андреа“ ќе попаѓаат и потешко ќе се жнеат, а тие што се поситните и пониски ќе немаат проблем. Ако даде до 800 килограми ќе биде голем успех, а над 800 супер, но ќе видиме. Самите гледате, препаратите за прскање и сами не знаеме од каде се, што се. Прскавме еднаш, прскаме два пати и се откажеме, просото не е уништено, трева има, така што сме многу разочарани. Тука треба да се води сметка за препаратите за прскање, да не се продаваат по гаражите, по шталите, да има институција која ќе гарантира за квалитетот на препаратите, истакна Љубе Ѓорѓиев, оризопроизводител од Кочани.
Во рамки на настанот професори од Земјоделскиот факултет при Универзитетот „Гоце Делчев“ го претставија проектот „КАРБОНИКА – Јаглеродна иницијатива за климатски отпорно земјоделство“.
-Јаглеродното земјоделство е научно докажан и практично применлив пристап за подобрување, односно адаптирање на земјоделството кон климатските промени. Во комбинација со одредени иновативни практики придонесува за намалување на емисијата на стакленички гасови за време на производството на земјоделските култури, односно за зголемено зафаќање на стакленичките гасови и нивно складирање во почвата и во биомасата, истакна Верица Илиева, професорка на Земјоделскиот факултет при Универзитетот „Гоце Делчев“ – Штип.
Поддршка во организацијата на овогодишното рачно зажнејување дадоа и членовите на фолклорниот ансамбл „Љупчо Сантов“ од Оризари, а за присутните на настанот беа послужени традиционални специјалитети од ориз.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
