Доброволното противпожарно друштво – Виница доби навално возило за гасење пожари и други интервенции, а го донираше Ротари клубот Кочани – Виница.
Возилото пристигна од Германија, каде со поддршка од наши хумани луѓе е набавено и беше превезено за потребите на виничките пожарникари волонтери. Се работи за камион од марката мерцедес 811Д, кој е одлично зачуван со поминати само 23 илјади километри, поседува нова пумпа за вода и може да превезува девет лица.
На предавањето на возилото на пожарникарите присуствуваа претставници од Ротари клубот и од ДПД – Виница.
– Имаме чест денеска да донираме едно ново протопожарно возило за нашето Доброволно противпожарно друштво во Виница, за неуморните херои кои секогаш трчаат за да спасат некој дом, некој објект или нечиј живот. Во оваа прилика сакам да упатам голема благодарност до сите доброволци коишто учествуваат во Доброволното противпожарно друштво и ги охрабруваме и другите луѓе коишто сакаат да се приклучат со цел за да се зголеми бројот на доброволци. Со голем број на донации од наши пријатели го обезбедивме ова возило, а голема благодарност сакаме да упатиме и до „Аце ауто“ затоа што тој го најде, ја организираше целата логистичка поддршка од Германија, со сите царински увозни давачки и го донесовме возилото да биде денеска овде. Ги охрабруваме сите чинители во Виница и Кочани да помагаат на заедницата, бидејќи сите заедно можеме да направиме повеќе, истакна Влатко Тасев, претседател на Ротари клубот Кочани – Виница.
Од ДПД – Виница упатија благодарнопст за донацијата која ќе значи подобра противпожарна заштита и безбедност на луѓето и материјалните добра.
-За нас ова е надеж на ДПД, голема поддршка, исто како и за целата заедница. Во мои лично и во име на сите членови од ДПД сакам да се заблагодарам на Ротари клубот Кочани – Виница за оваа донација која е исклучително вредна и хумана за нашата заедница. Овој камион не е само возило, тој претставува безбедност и сигурност за нашите пожарникари за уште повеќе да имаат сила за работа и со ова значително ќе се подобрат условите за гасење и безбедност нашата општина. Овој камион ќе биде користен одговорно, совесно и со целосна посветеност, секогаш со служба и заштита на човечките животи имотот и природата на нашата општина. Уште еднаш голема благодарност до клубот, им посакуваме голем успех, да продолжат со ваквата работа, со овие донации за поголема сигурност на заедницата, а голема благодарност и до „Аце ауто’ кој го обезбеди превозот на камионот, истакна БранкоИвановски, претседател на Доброволното противпожарно друштво – Виница.
Противпожарниот камион е трето возило за ДПД – Виница кое веќе поседува пикап и комби за превоз на пожарникари.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
