Членовите на планинарскиот спортски клуб „Осогово“ му приредија свечен дочек на својот член Зоран Николов по неговото враќање од експедицијата во Јужна Америка, каде пред една недела се искачи на врвот Аконкагва, кој е највисок на планинскиот масив на Андите.
Во просториите на клубот го дочекаа дел од најактивните планинари за заеднички да ја споделат радоста од постигнатиот успех и да го прослават одличниот почеток на исполнувањето на годишниот план за активности.
Николов, заедно со уште тројца македонски планинари беше дел од експедицијата која успешно ја заврши мисијата за искачување на највисокиот планински врв во светот којшто не е во Азија, односно на Хималаите.
-Сакав да се искачам на 7.000 метри и успеав, затоа што Аконкагва без триесетина метри е блиску до таа височина. Условите беа сурови, на врвот дури ни нема снег, го има подолу на околу 5.000 метри, а на самиот врв има многу силни ветрови кои го дуваат и останува голо. Температурите се околу минус 30, па и пониски, а ветровите достигнуваат брзина до 80, па и 100 километри на час. Многу се сурови условите, нема никакво растение таму, ниту животинка. Ние бевме четворица од Македонија и двајца планинари од Србија и за среќа сите се искачивме. Пред нас имаше многу групи од по 8, 16 и повеќе луѓе кои не се искачија, но за нас тоа не беше демотивирачки. Ден-два пред да се искачиме имаше силни ветрови, па други планинари се вратија, немаа успех да дојдат до врвот. За среќа, ние имавме убав ден, температурата беше во минус, но немаше силен ветер и успеавме, истакна Николов.
Во текот на експедицијата, Николов заедно со своите колеги поминале неколку денови во различни базни кампови на височина меѓу четири и пет илјади метри, за да обезбедат аклиматизација и подготвеност на организмот за искачувањето.
-Треба да си максимално подготвен, физички и психички, а ова второто можеби е и побитно, затоа што мускулите работат, но мора психата да е подготвена за да не се откажеш. Се доаѓа во клучни моменти кога е многу тешко, се спие на -30 степени во шатори на височина од 6.000 метри. Секогаш си велам, само уште овој врв и готово, но никогаш не е така, се надевам дека во наредниот период ќе се искачам и на 8.000 метри, додава Николов.
Николов е штипјанец, но член е на ПСК „Осогово“ од Кочани, каде нашол одлични пријатели и услови за остварување на своите цели за искачување на планинските врвови.
-Ова јас го гледам како во другите спортови, на пример еден фудбалер некогаш и не игра во својот град. Си го сакам Штип секако, но го сакам и Кочани и планинарскиот клуб „Осогово“, затоа што тие ми се како фамилија и повеќе години членувам овде. Сплотени сме, убаво се дружиме на планините и насекаде. Најголемиот проблем е обезбедувањето средства за експедициите кои чинат многу, има некоја финансиска поддршка, можеби четвртина од целата сума, а поголемиот дел јас си го платив, но кога станува збор за мерак, за ќеф, така е, заклучува Николов.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
