Ротари клубот Кочани – Виница го промовираше проектот „Авантури на две тркала – по патот на комарците“, чија цел е промоција на велосипедизмот, културно-историските, природните и другите обележја на Кочанската Котлина.
Проектот е дел од одбележувањето на Светскиот ден без автомобили и Европската недела на мобилност, при што е направено дигитално мапирање на велосипедски патеки во должина од 60 километри. Тие се вклопени во осум различни рути и за нив е изработена и бесплатна апликација што може да се инсталира на андроид мобилни уреди.
-Мапирањето на патеките за велосипедизам се реализираше во изминатите шест месеци, изработена е веб платформа што може да се посети преку адресите velopateki.mk и bikeroutеs.mk од каде може да се преземе апликацијата. Овде можат да се најдат сите информации за проектот, а ќе има и податоци за важните знаменитости и обележја, понудата на сместувачките и угостителските капацитети и важните културно-уметнички настани во текот на годината. Тоа значи дека проектот има еколошка, но и туристичко-промотивна цел, односно со мапирањето на патеките сакаме да ги промовираме здравите навики и заштитата на животната средина преку возење велосипед, со вклучување на децата од претшколска возраст, младите, но и повозрасните лица, домашни и странски посетители и туристи, истакна Зафир Наков, претседател на Ротари клубот Кочани – Виница.
Веб платформата во рамки на проектот ќе биде отворена и постојано ќе се надополнува со нови информации и податоци, при што се нуди можност за промоција на локалните бизниси, кои можат да остварат и електронски контакт. Општините Кочани, Виница, Зрновци и Чешиново-Облешево, како партнери во проектот, презедоа обврска да постават информативни паноа и табли за знаменитостите на нивна територија.
Поддршка за реализација на проектот дадоа и УСАИД, Фондацијата за развој на локалната заедница од Штип, Сојузот на Ротари клубови на Македонија и велосипедскиот спортски клуб „Електрика“ од Кочани.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
