Јавното обвинителство за гонење на организиран криминал и корупција не го испочитува рокот за обезбедување информација за тоа како тече и каков е статусот на обинителниот акт во врска со трагедијата во клубот „Пулс“, истакнаа родителите на загинатите на денешниот 33. „Марш за ангелите“ што се одржа во Кочани.
Во обраќањето до Обвинителството тие нагласија дека не бараат ништо повеќе од она што го гарантира законот, односно навремена, законска и непристрасна постапка, како и јасен одговор околу обвинението.
–Согласно начелата на владеење на правото, законитост и еднаквост на сите граѓани пред законот, покажавме трпение и одговорност и во период од три плус три месеци не побаравме информација за текот и статусот на обвинителниот акт. Тоа го сторивме со цел да ѝ овозможиме на надлежната институција непречено и професионално постапување. Меѓутоа, рокот што беше јавно и институционално најавен, со краен датум до 12.12.2025, е пробиен, без доставено образложение, без официјално известување и без преземање видливи процесни дејствија. Дополнително загрижува фактот што службеници на Министерството за внатрешни работи, кои се осомничени во конкретниот предмет, и понатаму се наоѓаат на слобода и се движат меѓу граѓаните, без јавно познати мерки на претпазливост, суспензија или друга форма на институционална одговорност, истакна Розета Блажева чиј брат загина во пожарот во „Пулс“.
Од Здружениетo „16 март 2025 – Кочани“ побараа одговор кои се причините за пробивање на утврдениот рок и какви мерки се преземени или ќе се преземат во однос на осомничените службеници на МВР.
-Потсетуваме дека службениците на МВР, согласно закон, имаат зголемена одговорност поради природата на нивната функција, овластувањата што им се доверени и довербата што им ја укажуваат граѓаните. Непостапувањето или одолговлекувањето во случаи каде осомничени се токму лица задолжени за спроведување на законот, создава основан сомнеж за селективност, што е спротивно на основните принципи на правната држава. Отсуството на навремена реакција и транспарентност директно ја нарушува правната сигурност, ја поткопува довербата во институциите и остава впечаток дека постои институционална толеранција кон евентуални незаконски дејствија извршени од службени лица. Нашето трпение не е неограничено. Во отсуство на итен и јасен одговор, ќе бидеме принудени да ги искористиме сите законски и јавни механизми за заштита на правдата и јавниот интерес, додаде Блажева.
Вообичаено, „Маршот за ангелите“ тргна од Паркот на Револуцијата кон Трговскиот центар, потоа кон Управата за јавни приходи, Полициската станица и Основниот суд и Обвинителството во Кочани.
За разлика од претходните маршеви, изостана масовната поддршка од граѓаните. Исто така, го немаше и големиот транспарент со ликовите на загинатите во пожарот што наместо на чело на колоната, беше истакнат во салата „Сашо Лазарев – Чапо“ каде во чест на кочанските ангели се одржа меморијалниот турнир во борење „Легендите на Спартак“.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
