Ние, родителите, носиме болка што не се опишува со зборови, болка од последниот повик и од сознанието дека нашите деца умирале во ужас, во чад, во страв, оставени без заштита, без одговорност, без спас, рекоа родителите на загинатите во клубот „Пулс“ на 35. „Марш за ангелите“ што се одржа во Кочани.
Колоната што во 14 часот и 5 минути тргна од Паркот на Револуцијата и се упати кон Трговскиот центар, Управата за јавни приходи, Полициската станица и Основниот суд, запираше на неколку места на коишто од семејствата на настраданите упатија лични пораки до своите деца во пресрет на претстојните празници.
-Пред Нова година и Божиќ, кога светот се радува, кај нас празниците болат најмногу. Ние ги броиме празните столчиња, палиме свеќи таму каде што требаше да светат елки. Кај нас нема честитки — има солзи, нема желби — има прашања без одговор. И не тагуваме само за нашите деца, тагуваме и за нашите внучиња, деца што останаа без родители. Деца што ќе растат без мајчина прегратка, без татков глас. Деца што никогаш нема да ги запознаат своите мајки и татковци, затоа што им беа одземени пред да можат да ги изговорат тие зборови. Нашите деца не загинаа во несреќа. Тие беа затворени во простор што се претвори во гасна комора. Жртви на корупција, жртви на негрижа, жртви на систем што не заштитува, туку убива. И за крај на оваа најтешка година, во пресрет на новогодишните и божиќните празници кога светот си посакува среќа, здравје и радост, ние, родителите на загинатите деца, ви посакуваме пред сè — човечност. Посакуваме да ги прегрнете своите деца малку посилно. Да ги погледнете подолго. Да им кажете „те сакам“ уште еднаш повеќе. Затоа што ние таа можност ја немаме. Нека овие празници ве потсетат дека животот е кревок, дека децата се најголемото богатство и дека молкот пред неправдата е соучество, истакна Васка Стојанова, чиј син единец настрада во „Пулс“.
Семејствата на загинатите им порачаа на сите граѓани кога ќе ги запалат новогодишните светилки, да светнат и совеста и одговорноста, а ако веќе си посакуваат подобра година, таа да биде година на вистина, правда и грижа за секое дете.
На крајот, честитајќи ги новогодишните празници, иако со скршени срца, посакаа мир во домовите, љубов меѓу луѓето и иднина во која ниедна мајка и ниеден татко нема да го живеат она што тие го живеат.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
