Доброволната планинска спасителска служба „Осогово“ од Кочани и Интернационалната полициска организација (ИПО) со седиште во Милано, Италија, денеска потпишаа договор за соработка на програми и проекти што се од заеднички интерес за унапредување на нивното дејствување.
Покрај договорот за соработка, ИПО која е мултинационална професионална и образовна невладина организација и има посебен консултативен статус со Економскиот и социјален совет на Обединетите нации, отвори и канцеларија во Кочани, со што дополнително ќе го зајакне своето работење.
-Договорот со спасителската служба од Кочани е дел од определбите да го унапредиме нашето присуство во Македонија за што веќе потпишавме слични документи со Министерството за внатрешни работи, со општини, амбасади и други здруженија. Во зависност од областа во која тие дејствуваат, ќе подготвиме проекти на кои заеднички ќе работиме, особено во обезбедувањето меѓународна поддршка за нивна практична реализација, истакна Сејфула Бектеши, претседател на македонската секција на ИПО.
Во рамки на соработката се планира просториите и опремата со кои располага планинската спасителска служба од Кочани да се користат како тренинг центар за членовите на ИПО и за ученици од основните и средните училишта.
-Планираме заеднички да отвориме центар за едукација за заштита и помош во природа, а практичната обука да се одржува на планинските терени на Осоговијата. Со оглед што кај нас нема задолжителен воен рок, сакаме на младите да им помогнеме да научат како да се снаоѓаат во специфични услови во планина, како сами да се извлечат од опасност со користење прирачни средства и да му помогнат на друго лице кое е повредено, истакна Гоце Исајов, претседател на Доброволната планинска спасителска служба „Осогово“.
Соработката на двете здруженија треба да овозможи и добивање финансиска поддршка од европските и меѓународните фондови.
-Ќе аплицираме со заедничи проекти за обезбедување средства, а со кои ќе ја унапредиме безбедноста на граѓаните при престој во планина. Сметаме дека Пониква и овој дел од Осоговските Планини имаат одлични услови за реализација на планот за отворање едукациски и тренинг центар во кој ќе можат да се обучуваат и членови на други спасувачки здруженија во Македонија, а во перспектива и од други држави, истакна Гоце Делчев Тодев, генерален секретар на македонската секција на ИПО.
Доброволната планинска спасителска служба „Осогово“ е дел од Националниот сојуз за планинско спасување и со своите 20 активни членови е единствено такво здружение во Источниот регион. Службата располага со два објекта на Пониква, како и со неопходната опрема за спасување лица во планински услови.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
