Со изложба на фотографии од одржаните настани, поставена во Градскиот парк во Кочани, завршија активностите наменети за млади од програмата „Лето во друштво“, чиј носител во изминатите две недели беше Центарот за психосоцијална и кризна акција „Малинска“ од Скопје.
– Ниедна помош во овој период нема толку силно значење како што е оваа, од Центарот за психосоцијална и кризна акција „Малинска“, кој претходните две недели им се посвети на младите и на нивното закрепнување по трагедијата што ни се случи во Кочани. Нашиот главен фокус е кон луѓето, нашите напори се насочени кон младите, на кои им треба креативно канализирање на нивната енергија, рече пред присутните в. д. градоначалникот Венко Крстевски.
Изразувајќи благодарност кон сите учесници на настаните и на волонтери од Локалниот младински совет – Кочани, претставниците на „Малинска“ им доделија сертификати.
Лина Ќостарова-Унковска, директорката на Центарот за психосоцијална и кризна акција „Малинска“, истакна дека замислата на програмата „Лето во друштво“ е поврзувањето на луѓето, поддршка во процесот на заздравување со настојување тагата по загубените во трагедијата да се трансформира во надеж.
Настанот во Градскиот парк заврши со ритуал во сеќавање на починатите во несреќата. Во програмата за млади „Лето во друштво“ учествуваа 33 професионалци – актери, режисери, спортисти, психолози, фотографи, уметници…, сите на доброволна основа, без паричен надоместок, сѐ со цел да им помогнат на младите и на сите граѓани на Кочани и микрорегионот.
Центарот за психосоцијална и кризна акција „Малинска“ во средината на јуни годинава во Кочани го организираше престојот на седумчлена делегација од Гетеборг, Шведска. Во тимот имаше социјални работнички, пожарникари и преживеани од сличен пожар во дискотека што се случил во клуб во шведскиот град. На семејствата на настраданите и на граѓаните на Кочани тие им ги пренесоа сопствените искуства од заздравувањето и рехабилитацијата по несреќата 27 години подоцна.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
