Родителите на загинатите во трагедијата во „Пулс“ и Здружението „16 март 2025 – Кочани“ денеска ја одржаа третата едночасовна блокада на кружниот тек кај двојниот мост на булеварот „Стево Теодосиевски“ во Кочани.
Рекоа дека не сакаат да зборуваат само за своите починати деца, туку се собрале и за оддадат почит на најновата жртва од пожарот, неполни седум месеци од кобната ноќ.
-Денеска добивме лоша вест. После шест откако помина последната вест од жртвите што ги однесе пожарот, шест месеци мислевме дека повредените веќе се добри, дека работите се одвиваат во најдобар тек, дека сите ќе заздрават – денеска дознавме дека Владимир Блажев – Панчо, за жал, не можеше да ги издржи повредите и тој почина. Ние, родителите на загинатите деца, преку социјалните мрежи веќе објавивме сочувство до неговата фамилија, но истото сакаме и јавно да го соопштиме.
Изразуваме најдлабоко сочувство до семејството на Владимир Блажев – Панчо, Бог да Ви дава сила. Со длабока тага и солзи во очите ја примивме веста за загубата на уште еден млад живот – Владимир Блажев, Панчо, талентиран пејач од групата ДНК, 63-та жртва од пожарот во дискотеката „Пулс“ во Кочани. Млад човек, со сонувања, со музика и со енергија што допираше срца, сега замина предвреме, оставувајќи празнина која не може да се пополни. Како родители кои ја почувствувавме најголемата болка од губење на нашите деца, ја знаеме бездната на тага што останува зад себе. Вашата болка е и наша болка. Вашата загуба е и наша загуба. Ги чувствуваме секоја солза, секој нем збор, секој празен момент што го остава оваа трагедија. Ова не е само број – ова е живот одземен, живот што носеше радост и надеж. Колку уште срца ќе бидат скршени, директно или индиректно? Колку уште семејства ќе бидат погодени од оваа ужасна трагедија? Правдата мора да се извојува! За Панчо, за секоја жртва, за секој млад живот што беше одземен, за секој родител што плаче. Почивај во мир, Панчо. Нека ти е светол патот до Царството Небесно.
И, Панчо – пренеси им поздрав и порака на нашите ангели дека засекогаш ќе останат во нашите срца. А ние нема да молчиме – правдата мора да дојде. Ќе ве молам една минута молк за Панчо, рече Марија Петрушова, чиј син загина во „Пулс“.
Блокадата на крстосницата кај двојниот мост се одвиваше во периодот од 15:15 до 16:15 часот. Сообраќајот за сите возила беше пренасочуван по другите улици, освен возилата на итната медицинска помош, кои беа уредно пуштени да поминуваат.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
